پنجاب میں شہریوں کے لیے میرج سرٹیفکیٹ(Marriage certificate) کے حصول کے نظام میں بڑی اصلاحات کرتے ہوئے ایک جدید اور ڈیجیٹل سہولت کا آغاز کر دیا گیا ہے، جس کا مقصد رجسٹریشن کے عمل کو آسان، تیز اور شفاف بنانا ہے۔
یہ نئی سہولت پنجاب انفارمیشن ٹیکنالوجی بورڈ کے زیرِ انتظام 15 ای-خدمت مراکز میں فراہم کی جا رہی ہے، جہاں شہری اب شادی کی رجسٹریشن اور میرج سرٹیفکیٹ کے اجرا کے لیے لمبی قطاروں اور پیچیدہ کاغذی کارروائی سے نجات حاصل کر سکیں گے۔
ای-خدمت مراکز کا نظام کیسے کام کرے گا؟
نئے نظام کے تحت شہری صبح 9 بجے سے شام 5 بجے تک کسی بھی قریبی ای-خدمت مرکز سے رجوع کر سکتے ہیں۔ وہاں موجود عملہ درخواست دہندگان کی دستاویزات کی جانچ کرے گا اور رجسٹریشن کا عمل ڈیجیٹل سسٹم میں مکمل کرے گا۔
اہم دستاویزات
شادی کی رجسٹریشن کے لیے بنیادی طور پر درج ذیل دستاویزات درکار ہوں گی:
- نکاح نامہ
- دولہا اور دلہن کے شناختی کارڈز
- والدین کے شناختی کارڈز
- نکاح کے گواہوں کے شناختی کارڈز
رجسٹریشن کا مرحلہ وار طریقہ
پہلے مرحلے میں درخواست گزار یونین کونسل یا ای-خدمت مرکز میں اپنی درخواست جمع کراتا ہے۔ اس کے بعد:
- تمام دستاویزات کی تصدیق کی جاتی ہے
- ڈیٹا سسٹم میں درج کیا جاتا ہے
- نکاح نامے کا پرنٹ آؤٹ فراہم کیا جاتا ہے
- درخواست گزار پروف ریڈنگ کرتا ہے
- درستگی کی صورت میں دستخط کر کے تصدیق کرتا ہے
- حتمی میرج سرٹیفکیٹ جاری کر دیا جاتا ہے
- سرکاری محکمے میں بھرتیوں کا آغاز، تنخواہ ڈیڑھ لاکھ اور پرکشش مراعات
آن لائن سہولت بھی دستیاب
حکومت کے مطابق شہری مزید آسانی کے لیے e-Khidmat Portal Punjab کے ذریعے بھی معلومات حاصل کر سکتے ہیں، جہاں مختلف سروسز کے لیے درخواستوں کی رہنمائی موجود ہے۔
مزید برآں شہری ہیلپ لائن 1317 پر کال کر کے بھی معلومات اور رہنمائی حاصل کر سکتے ہیں۔
پہلے اور اب کا فرق
اس سے قبل میرج سرٹیفکیٹ کے لیے یونین کونسل کے بار بار چکر لگانے پڑتے تھے، جبکہ دستاویزات کی دستی جانچ اور طویل پراسیسنگ وقت بھی ایک بڑا مسئلہ تھا۔ نئے ڈیجیٹل نظام کے تحت یہ تمام مراحل ایک ہی جگہ اور کم وقت میں مکمل کیے جا سکیں گے۔
حکومت کا مؤقف
حکام کے مطابق یہ اقدام ڈیجیٹل گورننس کی طرف ایک اہم قدم ہے جس کا مقصد عوامی خدمات کو جدید خطوط پر استوار کرنا، کرپشن کے امکانات کم کرنا اور شہریوں کے وقت و وسائل کی بچت یقینی بنانا ہے۔
یہ نظام خاص طور پر نوجوان جوڑوں کے لیے سہولت پیدا کرے گا جو اب بغیر کسی اضافی پریشانی کے اپنے قانونی کاغذات بروقت حاصل کر سکیں گے۔
