کراچی: پاکستان بینکنگ سمٹ 2026 کے دوسرے ایڈیشن کا باضابطہ اعلان کر دیا گیا ہے، جو 7 اور 8 جولائی 2026 کو کراچی میں منعقد ہوگا۔ پاکستان بینکس ایسوسی ایشن (PBA) کے زیر اہتمام ہونے والا یہ دو روزہ سمٹ ملک کے مالیاتی شعبے، بینکاری صنعت اور معاشی پالیسیوں پر اعلیٰ سطحی مکالمے کا اہم پلیٹ فارم ثابت ہوگا۔
پاکستان بینکس ایسوسی ایشن کے مطابق پاکستان بینکنگ سمٹ 2026 میں بینکاری شعبے کے رہنما، حکومتی پالیسی ساز، ریگولیٹرز، کارپوریٹ ایگزیکٹوز، ماہرین تعلیم اور بین الاقوامی مالیاتی اداروں کے نمائندے شرکت کریں گے۔ سمٹ کا مقصد مالیاتی شعبے کو درپیش چیلنجز، مواقع اور مستقبل کی حکمت عملی پر مشترکہ لائحہ عمل تشکیل دینا ہے۔
کراچی میں منعقدہ پریس کانفرنس کے دوران پاکستان بینکنگ سمٹ کی اسٹیئرنگ کمیٹی کے چیئرمین اور بینک الفلاح کے صدر و چیف ایگزیکٹو آفیسر عاطف باجوہ، پاکستان بینکس ایسوسی ایشن کے چیئرمین اور بینک آف پنجاب کے صدر و چیف ایگزیکٹو آفیسر ظفر مسعود، جبکہ ایسوسی ایشن کے چیف ایگزیکٹو آفیسر و سیکریٹری جنرل منیر کمال نے سمٹ کی تفصیلات سے آگاہ کیا۔
سمٹ میں نو مختلف موضوعاتی سیشنز منعقد کیے جائیں گے جن میں عالمی اور قومی معاشی صورتحال، زرعی شعبے کی مالی معاونت، چھوٹے اور درمیانے درجے کے کاروبار (SMEs)، کم لاگت رہائش، ڈیجیٹل بینکاری، ڈیجیٹل ادائیگیوں کا نظام، موسمیاتی تبدیلی سے ہم آہنگ مالیاتی نظام، اسلامی بینکاری، بینکوں اور کیپٹل مارکیٹس کے درمیان تعاون، اور مستقبل کی قیادت کی تیاری جیسے اہم موضوعات زیر بحث آئیں گے۔
منتظمین کے مطابق سمٹ میں ایک ہزار سے زائد شرکاء شرکت کریں گے، جبکہ 15 سے زائد بین الاقوامی اور 20 سے زائد پاکستانی ماہرین اپنے خیالات کا اظہار کریں گے۔ لاہور یونیورسٹی آف مینجمنٹ سائنسز (LUMS) کے بانی پرو چانسلر سید بابر علی کا خصوصی ویڈیو پیغام بھی پروگرام کا حصہ ہوگا، جبکہ 48 سے زائد مالیاتی اداروں کی نمائندگی بھی موجود ہوگی۔
سمٹ کے تصدیق شدہ کلیدی مقررین میں وفاقی وزیر خزانہ و محصولات سینیٹر محمد اورنگزیب، اسٹیٹ بینک آف پاکستان کے گورنر جمیل احمد، اور وزیر مملکت برائے خزانہ و ریلوے بلال اظہر کیانی شامل ہیں، جو پاکستان کی معیشت اور مالیاتی شعبے کے مستقبل پر اپنے خیالات پیش کریں گے۔
پریس کانفرنس سے خطاب کرتے ہوئے عاطف باجوہ نے کہا کہ پاکستان بینکنگ سمٹ 2026 ایسے وقت میں منعقد ہو رہا ہے جب وفاقی بجٹ کے بعد معیشت کے مختلف پہلوؤں پر سنجیدہ غور و فکر کی ضرورت ہے۔ ان کے مطابق یہ فورم صرف پالیسی اعلانات تک محدود نہیں بلکہ عملی اقدامات، باہمی تعاون اور قابلِ عمل تجاویز پر توجہ مرکوز کرے گا۔
پاکستان بینکس ایسوسی ایشن کے چیئرمین ظفر مسعود نے کہا کہ پاکستان بینکنگ سمٹ صنعت، حکومت اور ریگولیٹرز کو ایک پلیٹ فارم پر لا کر مشترکہ حکمت عملی تشکیل دینے کی بہترین کوشش ہے، جبکہ منیر کمال کے مطابق یہ سمٹ جدید مالیاتی نظام، بینکاری اصلاحات اور عالمی تجربات سے استفادہ کرنے کا مؤثر ذریعہ ثابت ہوگا۔
منتظمین کا کہنا ہے کہ پاکستان بینکنگ سمٹ 2026 ملک میں مضبوط، جامع اور مستقبل سے ہم آہنگ مالیاتی نظام کی تشکیل کے لیے اہم کردار ادا کرے گا اور پاکستان کی پائیدار معاشی ترقی کے لیے قابلِ عمل سفارشات مرتب کرنے میں مددگار ثابت ہوگا۔
