لاہور(ویب ڈیسک )پنجاب حکومت نے سکولوں کی نجکاری کے خلاف احتجاج کرنے والے تمام اساتذہ کو معطل کر دیا ہے۔نواز لیگ حکومت نے 2025 تک مزید 15,000 اسکولوں کی نجکاری کا منصوبہ بنایا لیاہے۔
محکمہ تعلیم کی طرف سے پنجاب ٹیچرز یونین اینڈ ایجوکیٹرز ایسوسی ایشن کے صدور اور سیکرٹریز کو معطل کر دیاگیا ہے۔ دونوں ایسوسی ایشنز کے صدور اور جنرل سیکرٹریز کو شوکاز نوٹس بھی جاری کر دیے گئےہیں ۔
یونین عہدیداران قاضی عمران، ملک امجد، اخیان گل، راجہ تیمور اختر، اور دیگر کے خلاف قانونی کارروائی شروع کر دی گئی ہے۔
حکومت کے فیصلے کے مطابق احتجاج میں اساتذہ نے آج سکولوں کو تالے لگا دیئے۔ ہڑتال کے باعث تمام سرکاری سکولوں میں تدریسی نظام مکمل طور پر ٹھپ ہو کر رہ گیا ہے۔
چیف ایگزیکٹوایجوکیشن اتھارٹی نے اساتذہ کو خبردار کیا ہے کہ وہ فوری ہڑتال ختم کر کے تدریسی عمل شروع کر دیں۔
اساتذہ تنظیموں نے کہا ہے کہ وہ سکولوں کی نجکاری کو قبول نہیں کریں گے۔ انہوں نے گرینڈ ٹیچرز الائنس کا اجلاس طلب کر کے احتجاج میں شدت لانے کے لیے نئی حکمت عملی کا اعلان کردیاہے۔
مذکورہ منصوبے کا تیسرا مرحلہ ستمبر کے اوائل میں طے کیا گیا تھا، جس کے دوران مزید 2,903 اسکولوں کی نجکاری کی جانی تھی۔
اس پالیسی کے مطابق پنجاب میں سرکاری سکولوں کی تعداد میں زبردست کمی واقع ہو جائے گی، جس سے صرف 35,000 سکولزبراہ راست پبلک ایڈمنسٹریشن کے تحت رہ جائیں گے۔
پنجاب کی وزیر اعلیٰ مریم نواز نے نجکاری کی کوششوں کا مضبوطی سے دفاع کرتے ہوئے اساتذہ کی یونینوں کی جانب سے اس عمل کو روکنے کے مطالبات کو مسترد کر دیاہے۔؎
انہوں نے دلیل دی کہ نجکاری سے تعلیمی نظام اوراسکول کے حالات بہتر ہوں گے اور بالآخر تعلیمی کارکردگی میں اضافہ ہوگا۔
تاہم، اس اقدام کو اساتذہ کی تنظیموں کی طرف سے سخت مزاحمت کا سامنا کرنا پڑا، جن کا خیال تھا کہ نجکاری سے تعلیم کے معیار کو نقصان پہنچے گا اور اساتذہ کی ملازمتوں کے تحفظ کو خطرہ لاحق ہو گا۔
فروری سے 31 مئی تک جاری رہنے والی داخلہ مہم کے پہلے مرحلے کے دوران محکمہ تعلیم میں اس وقت داخلے کی شرح میں ریکارڈ کمی دیکھی جا رہی ہے۔ 15 اگست کو گرمیوں کی تعطیلات کے بعد شروع ہونے والا دوسرا مرحلہ بھی اتنا ہی ناکام ثابت ہو رہا ہے۔
مزید پڑھیں:ٹک ٹاک نے پیسے کمانا اورآسان بنا دیا ، کیسے ؟ جانیں
