اسلام آباد: روٹی اور نان کی قیمت میں ایک بار پھر اضافہ کر دیا گیا ہے، جس کے بعد سادہ روٹی کی قیمت 25 روپے جبکہ نان 35 روپے میں فروخت کیا جا رہا ہے۔ قیمتوں میں حالیہ اضافے کے بعد شہریوں نے مہنگائی پر شدید تشویش کا اظہار کیا ہے۔
نان بائیوں کے مطابق آٹے کی قیمت میں مسلسل اضافے کے باعث پرانے نرخوں پر روٹی اور نان فروخت کرنا ممکن نہیں رہا۔ ان کا کہنا ہے کہ 20 کلو آٹے کا تھیلا تقریباً 2,400 روپے تک پہنچ چکا ہے، جس کی وجہ سے پیداواری لاگت میں نمایاں اضافہ ہوا ہے۔
نان بائیوں کا مؤقف ہے کہ خام مال، ایندھن اور دیگر اخراجات بڑھنے کے بعد قیمتوں میں نظرثانی ناگزیر ہو گئی تھی۔ انہوں نے خبردار کیا ہے کہ اگر متعلقہ حکام نئے نرخوں کو تسلیم نہیں کرتے تو تندور بند کرنے پر مجبور ہوں گے۔
دوسری جانب شہریوں کا کہنا ہے کہ روٹی اور نان کی قیمت میں بار بار اضافے نے گھریلو بجٹ کو بری طرح متاثر کیا ہے۔ ان کے مطابق روزمرہ استعمال کی اشیا مسلسل مہنگی ہو رہی ہیں جبکہ آمدنی میں کوئی خاطر خواہ اضافہ نہیں ہوا، جس سے متوسط اور کم آمدنی والے طبقے کے لیے دو وقت کی روٹی کا انتظام بھی مشکل بنتا جا رہا ہے۔
معاشی ماہرین کا کہنا ہے کہ خوراک کی بنیادی اشیا کی قیمتوں میں مسلسل اضافہ براہِ راست عوام کی قوت خرید کو متاثر کرتا ہے، اس لیے ضروری ہے کہ مہنگائی پر قابو پانے اور بنیادی اشیائے خور و نوش کی قیمتوں میں استحکام کے لیے مؤثر اقدامات کیے جائیں۔
