بنگلورو (اوصاف نیوز) بھارتی اداکارہ نندنی نے والدین کی مرضی کے خلاف شادی کے لیے دباؤ ڈالنے پر خودکشی کر لی۔
بھارتی میڈیا کے مطابق کنڑ اور تامل ٹیلی ویژن کی اداکارہ نندنی سی ایم نے بنگلورو میں اپنے گھر میں خودکشی کرلی۔ اس نے اپنی موت سے پہلے ایک تحریری نوٹ بھی چھوڑا۔
اداکارہ نے اپنے والدین کو تحریری نوٹ لکھا جس میں کہا گیا کہ وہ شادی کے لیے دباؤ میں تھیں اور ذہنی طور پر اس کے لیے تیار نہیں تھیں جب کہ وہ دیگر مسائل کے باعث ڈپریشن کا بھی شکار تھیں۔
فی الحال، نندنی کی موت کی اصل وجہ کے بارے میں کوئی سرکاری تصدیق نہیں ہے۔ پولیس کا کہنا ہے کہ تفتیش مکمل ہونے کے بعد مزید معلومات فراہم کی جائیں گی۔
رپورٹس کے مطابق نندنی نے اپنے نوٹ میں لکھا کہ اس کے والدین اس کی مرضی کے خلاف شادی کے لیے مجبور کر رہے تھے، میں جذباتی دباؤ میں تھی۔
پولیس کا کہنا ہے کہ تحقیقات کے دوران اس نوٹ کے مندرجات کو جانچ کے لیے لے جایا گیا ہے۔
بھارتی میڈیا کا کہنا ہے کہ یہ ایک افسوسناک اتفاق ہے۔ نندنی کو حال ہی میں تامل سیریل گوری میں دیکھا گیا تھا، جس میں ان کے کردار کو زہر پیتے ہوئے دکھایا گیا تھا، جس کے بعد اس منظر نے سوشل میڈیا پر ایک نئی بحث چھیڑ دی ہے، تاہم حکام نے اس منظر کو ان کی موت کے حالات سے جوڑنے سے انکار کر دیا ہے۔
مزید پڑھیں:وزیراعلیٰ خیبرپختونخوا کو بڑا پن دکھانا چاہیے ،شمائلہ رانا
