جدہ(نیوز ڈیسک)سعودی وزارت حج و عمرہ نے عمرہ زائرین کی سہولت کے لیے اردو سمیت 16 مختلف زبانوں میں ’عمرہ و زیارت گائیڈ‘ جاری کیا ہے جس کا مقصد عازمین کو ان کی اپنی زبان میں اہم معلومات فراہم کرنا ہے۔
سعودی نیوز ایجنسی کی رپورٹ کے مطابق عمرہ زائرین کی سہولت کے لیے جاری کردہ گائیڈ میں عمرہ اور حج کے مختلف مراحل سے متعلق مکمل اور تفصیلی معلومات شامل ہیں۔
رپورٹس کے مطابق یہ عمرہ کی تیاری سے لے کر ناسک کے لیے ویزا اور عمرہ پرمٹ حاصل کرنے، حرمین شریفین میں نقل و حمل اور واپسی کے سفر تک کے مراحل پر آسان زبان میں رہنمائی فراہم کرتا ہے۔
اس کے علاوہ معلوماتی گائیڈ کی پیروی کو آسان بنانے کے لیے تصاویر بھی شامل کی گئی ہیں جب کہ مختلف مقامات کے نقشے اور معلوماتی ویڈیوز بھی موجود ہیں تاکہ عازمین کو کسی قسم کی دشواری کا سامنا نہ کرنا پڑے۔
ڈیجیٹل گائیڈ بک میں احرام، طواف، سعی اور عمرہ سے متعلق دو مقدس مساجد کے آداب کے علاوہ دو مقدس مساجد میں فراہم کی جانے والی بنیادی خدمات کو بیان کیا گیا ہے۔
سعودی وزارت حج و عمرہ کے مطابق عمرہ و زیارت گائیڈ کا مقصد عمرہ زائرین کو بہتر خدمات کی فراہمی کو یقینی بنانا ہے تاکہ عازمین اپنے عمرہ کے سفر کے دوران فراہم کی جانے والی خدمات سے صحیح طریقے سے مستفید ہو سکیں۔
مزید پڑھیں:ڈرائیونگ لائسنس بنوانا اب مزید آسان، حکومت کی بڑی سہولت کا اعلان
