اسلام آباد: یوم عاشور کے موقع پر نادرا دفاتر بند رکھنے کا اعلان کر دیا گیا ہے، جس کے بعد شہریوں کو ضروری دستاویزی امور کے لیے پیشگی منصوبہ بندی کی ہدایت کی گئی ہے۔ نیشنل ڈیٹا بیس اینڈ رجسٹریشن اتھارٹی (نادرا) کی جانب سے جاری اعلامیے کے مطابق ملک بھر میں یوم عاشور کی تعطیلات کے دوران دفاتر میں عوامی خدمات معطل رہیں گی۔
ترجمان نادرا کے مطابق 25 اور 26 جون 2026 کو ملک بھر کے تمام نادرا دفاتر بند رہیں گے۔ اس دوران شہریوں کو شناختی کارڈ، فیملی رجسٹریشن سرٹیفکیٹ اور دیگر دستاویزات سے متعلق خدمات دفاتر میں دستیاب نہیں ہوں گی۔
اعلامیے میں مزید بتایا گیا ہے کہ 24 گھنٹے فعال رہنے والے مراکز بھی 24 اور 25 جون کی درمیانی شب 12 بجے سے 27 جون کی صبح 8 بجے تک بند رہیں گے۔ اس فیصلے کا مقصد یوم عاشور کے موقع پر سرکاری تعطیلات کے احکامات پر عملدرآمد کو یقینی بنانا ہے۔
نادرا حکام نے شہریوں کو مشورہ دیا ہے کہ اگر ان کے کوئی اہم دستاویزی معاملات زیر التوا ہیں تو وہ تعطیلات سے قبل مکمل کر لیں تاکہ کسی قسم کی دشواری کا سامنا نہ کرنا پڑے۔
تاہم نادرا نے واضح کیا ہے کہ تعطیلات کے دوران بھی متعدد آن لائن سہولیات دستیاب رہیں گی۔ شہری پاک آئی ڈی موبائل ایپ کے ذریعے گھر بیٹھے مختلف خدمات حاصل کر سکیں گے، جن میں شناختی دستاویزات کی تجدید اور بعض دیگر آن لائن سہولیات شامل ہیں۔
مزید برآں، ہفتہ کے روز کام کرنے والے میگا سینٹرز معمول کے مطابق اپنی خدمات جاری رکھیں گے اور تعطیلات کے اختتام کے بعد تمام دفاتر دوبارہ کھول دیے جائیں گے۔ نادرا دفاتر بند ہونے کے باوجود آن لائن سہولیات کی فراہمی شہریوں کے لیے بڑی سہولت قرار دی جا رہی ہے۔
