ایران کی جنگی حکمتِ عملی ایک بار پھر توجہ کا مرکز بن گئی ہے جب سابق وزیرِ خارجہ جواد ظریف نے حکومت کو مشورہ دیا کہ وہ فتح کا اعلان کر کے جاری کشیدگی کا خاتمہ کرے۔
انہوں نے اپنے ایک مضمون میں امریکا اور اسرائیل کے ساتھ تنازع کم کرنے کے لیے سفارتی راستہ پیش کیا۔ ان کے مطابق ایسا معاہدہ مستقبل میں نئی جنگ کے امکانات بھی کم کر سکتا ہے۔
جواد ظریف نے تجویز دی کہ ایران اپنے جوہری پروگرام پر حدود مقرر کر سکتا ہے۔ اس کے بدلے تمام بین الاقوامی پابندیاں ختم کی جائیں۔
انہوں نے آبنائے ہرمز کو دوبارہ کھولنے کی بھی بات کی، جو عالمی تیل کی ترسیل کے لیے نہایت اہم راستہ ہے۔
سابق وزیرِ خارجہ نے ایران اور امریکا کے درمیان عدم جارحیت کے معاہدے کی تجویز بھی دی، جس کے تحت دونوں ممالک ایک دوسرے پر حملہ نہ کرنے کی یقین دہانی کرائیں۔
ان کا کہنا تھا کہ ایران امریکا کے ساتھ اقتصادی تعلقات بھی قائم کر سکتا ہے، جس سے دونوں ممالک کے عوام کو فائدہ ہوگا۔
انہوں نے زور دیا کہ ان اقدامات سے ایران بیرونی خطرات سے ہٹ کر عوامی فلاح اور ملکی ترقی پر توجہ دے سکتا ہے۔
