اسلام آباد (اوصاف نیوز) سندھ اور پنجاب میں کرشنگ سیزن کے آغاز اور درآمدی چینی کے بڑے ذخائر کے باوجود ملک میں چینی کی ہول سیل اور ریٹیل قیمتیں بلند ترین سطح پر پہنچ گئیں۔
ہول سیل گروسر ایسوسی ایشن کے چیئرمین رؤف ابراہیم کے مطابق کراچی میں چینی کی فی کلو ہول سیل قیمت پہلی بار 202 روپے تک پہنچ گئی ہے۔
انہوں نے کہا کہ سندھ میں شوگر ملز مالکان نے گزشتہ دو روز سے کراچی کی ہول سیل مارکیٹوں میں چینی کی سپلائی بند کر رکھی ہے۔ ایک منظم منصوبے کے تحت پنجاب میں چینی کی فی کلو ہول سیل قیمت 175 روپے جبکہ خیبر پختونخوا میں 200 روپے تک پہنچ گئی ہے۔
رؤف ابراہیم کے مطابق کراچی کے مختلف علاقوں میں چینی کی پرچون قیمت 210 سے 215 روپے فی کلو تک پہنچ گئی ہے۔ شوگر ملوں کی جانب سے سپلائی بند ہونے کے باعث آنے والے دنوں میں چینی کی ہول سیل قیمت میں مزید اضافے کا خدشہ ہے۔
انہوں نے کہا کہ شوگر ملز نے گنے کے کاشتکاروں سے 350 سے 400 روپے فی کلو وصول کیے ہیں۔ اس طرح شوگر ملوں کی فی کلو گنے کی قیمت 10 روپے ہے۔
انہوں نے کہا کہ آئی ایم ایف نے اپنی رپورٹ میں شوگر مل مالکان کے گٹھ جوڑ کا ذکر کیا ہے لیکن حکومتی سطح پر کوئی کارروائی نہیں کی گئی۔ آئی ایم ایف کا مؤقف درست ہے اس لیے حکومت کو عوامی مفاد میں شوگر ملوں کی کارٹیلائزیشن کے خلاف فوری اور سخت ایکشن لینے کی ضرورت ہے۔
مزید پڑھیں:’کسان کارڈ ‘پر حکومت کا نیا اعلان سامنے آ گیا
