لاہور (اوصاف نیوز) لاہور کی ضلعی انتظامیہ نے بسنت کے لیے پتنگ سازوں کی رجسٹریشن فیس کی تفصیلات جاری کر دیں۔
ضلعی انتظامیہ نے تار اور پتنگ بنانے والوں کی رجسٹریشن فیس 1000 روپے مقرر کی ہے۔
حکام کا کہنا ہے کہ تار اور پتنگ فروخت کرنے والے تاجروں اور دکانداروں کی رجسٹریشن فیس ایک ہزار روپے ہوگی، جبکہ پتنگ بازی ایسوسی ایشنز کی فیس 5 ہزار روپے مقرر کی گئی ہے۔ پتنگ بنانے والوں اور تار بنانے والوں کی رجسٹریشن کے لیے فارم A استعمال کیا جائے گا۔
ضلعی انتظامیہ کے مطابق پتنگ بازی ایسوسی ایشنز کی رجسٹریشن کے لیے فارم سی استعمال کیا جائے گا۔
دوسری جانب لاہور میں محفوظ اور منظم بسنت کو یقینی بنانے کے لیے ضلعی انتظامیہ اے سی کی سربراہی میں خصوصی انفورسمنٹ سکواڈ تشکیل دے گی، رجسٹرڈ کائٹ فلائنگ ایسوسی ایشنز بھی سکواڈ کا حصہ ہوں گی۔
خصوصی دستے کسی بھی وقت دکانداروں اور تاجروں کے گوداموں کی چیکنگ کر سکیں گے۔ چیکنگ کے دوران اگر شیڈول ون کی خلاف ورزی کی گئی تو رجسٹریشن فوری طور پر منسوخ کر دی جائے گی اور قانونی کارروائی کی جائے گی۔ رجسٹرڈ کائٹ فلائنگ ایسوسی ایشنز ایک معاون باڈی کے طور پر کام کریں گی اور خود کوئی انفورسمنٹ نہیں کر سکیں گی۔
رجسٹرڈ ایسوسی ایشنز کو اس بات کی تصدیق کرنے کی ضرورت ہوگی کہ پتنگوں، مانجا اور روئی کی تاروں کا سائز شیڈول ون کے مطابق تیار کیا گیا ہے۔ رجسٹرڈ ایسوسی ایشنز محفوظ بسنت کے لیے ڈی سی کی مدد کریں گی۔
انتظامیہ نے ہدایت کی ہے کہ پتنگ کا سائز 40 انچ سے زیادہ نہیں ہوگا، پتنگ کی چوڑائی 30 انچ سے زیادہ نہیں ہوگی اور ڈور سوتی دھاگے سے بنائی جائے گی جس کی نو تاروں سے زیادہ نہ ہو۔
اسی طرح مانجہ میں گوند، سادہ رنگ، آٹا اور کمزور شیشہ کی اجازت ہوگی، تاہم، تار کے لیے صرف پائن کی اجازت ہوگی، چرخی کی اجازت نہیں ہوگی، اور تیز مانجہ، ٹنڈر، دھاتی تار اور کیمیکلز ممنوع ہوں گے۔
مزید پڑھیں:نادرا کا اوورسیزپاکستانیوں کے لیے اہم اعلان
