ابوظہبی (نیوز ڈیسک) اتحاد ایئرویز نے علاقائی فضائی حدود کی مسلسل بندش کے باعث اپنی پروازوں کے حوالے سے ایک اہم آپریشنل اپ ڈیٹ جاری کر دیا ہے۔
ایئر لائن کے مطابق ابوظہبی جانے اور جانے والی تمام پروازیں منگل 3 مارچ کو متحدہ عرب امارات کے وقت کے مطابق دوپہر 2 بجے تک معطل رہیں گی۔
ایئر لائن نے سوشل میڈیا پلیٹ فارم ایکس پر ایک بیان میں کہا کہ فضائی حدود کی بندش کی وجہ سے آپریشن متاثر ہو رہے ہیں۔
“تاہم، مسافروں کی حفاظت اولین ترجیح ہے اور خدمات تبھی بحال ہوں گی جب تمام حفاظتی تقاضے پورے ہوں گے۔”
مسافروں کے لیے اہم ہدایات
اتحاد ایئرویز نے متاثرہ مسافروں کو مشورہ دیا ہے کہ وہ ہوائی اڈے کے لیے روانگی سے قبل ویب سائٹ etihad.com پر فلائٹ کی تازہ ترین صورتحال چیک کریں اور اپنی بکنگ میں رابطے کی تفصیلات کو اپ ڈیٹ رکھیں۔
ایئر لائن کے مطابق، 28 فروری 2026 تک اصل سفری تاریخوں اور 7 مارچ 2026 تک کی سفری تاریخوں کے حامل ٹکٹ ہولڈرز بغیر کسی اضافی چارج کے 18 مارچ 2026 تک اتحاد سے چلنے والی پروازوں پر دوبارہ بک کر سکتے ہیں۔
اسی طرح 7 مارچ تک تمام پروازوں کے مسافر ویب سائٹ یا اپنے ٹریول ایجنٹ کے ذریعے مکمل رقم کی واپسی کی درخواست کر سکتے ہیں اور جن مسافروں نے ٹریول ایجنٹ کے ذریعے بکنگ کروائی ہے انہیں ہدایت کی گئی ہے کہ وہ اپنے ایجنٹ سے براہ راست رابطہ کریں۔
ایئر لائن نے مزید کہا کہ کال سینٹر پر غیر معمولی رش کی وجہ سے فون کالز کا جواب دینے میں تاخیر ہو سکتی ہے، اس لیے رقم کی واپسی کے خواہشمند مسافروں کو مشورہ دیا جاتا ہے کہ وہ آن لائن فارم استعمال کریں۔
اتحاد ایئرویز نے اپنے بیان میں واضح کیا کہ صورتحال پر مسلسل نظر رکھی جا رہی ہے اور جیسے ہی حالات معمول پر آئیں گے، پروازیں دوبارہ شروع کرنے کا اعلان کر دیا جائے گا۔
مزید پڑھیں:کویتی دفاعی نظام نے امریکی ایف پندرہ طیارے مار گرائے
