عالمی منڈی میں خام تیل(Crude Oil) کی قیمتوں میں نمایاں کمی دیکھنے میں آ رہی ہے اور قیمتیں ایک بار پھر 100 ڈالر فی بیرل کی سطح کے قریب پہنچ گئی ہیں، جس کی بڑی وجہ ایران کی جانب سے امریکہ کے ساتھ جنگ کے خاتمے کے لیے نئی پیشکش ہے۔
بین الاقوامی میڈیا رپورٹس کے مطابق ایران نے ثالثوں کے ذریعے امریکہ کو ایک حتمی مذاکراتی تجویز ارسال کی ہے، جس کے بعد عالمی آئل مارکیٹس میں غیر یقینی صورتحال کم ہونے لگی ہے اور سرمایہ کاروں نے منافع سمیٹنا شروع کر دیا ہے۔ اسی رجحان کے باعث تیل کی قیمتوں میں کمی ریکارڈ کی جا رہی ہے۔
امریکی خام تیل ویسٹ ٹیکساس انٹرمیڈیٹ (WTI) کی قیمت تقریباً 3 فیصد کمی کے بعد 101 سے 102 ڈالر فی بیرل کے درمیان ٹریڈ کر رہی ہے، جو کہ نفسیاتی حد 100 ڈالر کے انتہائی قریب ہے۔ ماہرین کا کہنا ہے کہ اگر کشیدگی میں مزید کمی کے واضح اشارے ملتے ہیں تو قیمت 100 ڈالر سے نیچے بھی جا سکتی ہے۔
آئی فون 17ایپل کااب تک کاسب سے زیادہ مقبول فون قرار
دوسری جانب برینٹ کروڈ، جو عالمی مارکیٹ کا اہم معیار سمجھا جاتا ہے، تقریباً 2 فیصد کمی کے بعد 108 ڈالر فی بیرل کے قریب آ گیا ہے۔ برینٹ اور WTI کے درمیان فرق اس بات کی نشاندہی کرتا ہے کہ عالمی سطح پر سپلائی ابھی بھی دباؤ کا شکار ہے۔
یاد رہے کہ حالیہ دنوں میں ایران اور امریکہ کے درمیان کشیدگی کے باعث تیل کی قیمتوں میں شدید اتار چڑھاؤ دیکھنے میں آیا تھا اور برینٹ کروڈ ایک موقع پر 120 ڈالر فی بیرل سے بھی تجاوز کر گیا تھا۔ تاہم اب ممکنہ مذاکراتی پیش رفت نے مارکیٹ کے رجحان کو تبدیل کرنا شروع کر دیا ہے۔
ماہرین کے مطابق اگر آبنائے ہرمز میں کشیدگی کم ہوتی ہے، جہاں سے دنیا کی تقریباً 20 فیصد تیل سپلائی گزرتی ہے، تو قیمتوں میں مزید کمی ممکن ہے۔ بصورت دیگر، کسی بھی نئی کشیدگی کی صورت میں تیل کی قیمتیں دوبارہ بڑھ سکتی ہیں۔
