اسلام آباد: ایران امریکا معاہدہ عالمی سفارت کاری کی ایک بڑی کامیابی قرار دیا جا رہا ہے اور وزیراعظم شہباز شریف نے اعلان کیا ہے کہ اس تاریخی معاہدے کی تقریب جمعے کے روز جنیوا میں منعقد ہوگی جس کی میزبانی پاکستان کرے گا۔
قومی اسمبلی کے اجلاس سے خطاب کرتے ہوئے وزیراعظم نے کہا کہ دنیا نے جنگ اور کشیدگی کے دور سے نکل کر امن کی جانب ایک اہم قدم بڑھایا ہے۔ ان کے مطابق ایران اور امریکا کے درمیان تمام محاذوں پر فوجی کارروائیوں کے مستقل خاتمے پر اتفاق عالمی امن کے لیے خوش آئند پیش رفت ہے۔
شہباز شریف نے کہا کہ ایران امریکا معاہدہ صرف دو ممالک کے درمیان مفاہمت نہیں بلکہ مکالمے، برداشت اور سفارت کاری کی فتح ہے۔ انہوں نے اس موقع پر پاکستانی قوم سمیت عالمی برادری کو مبارکباد پیش کی۔
وزیراعظم نے سابق وزیراعظم نواز شریف، صدر آصف علی زرداری، چیئرمین بلاول بھٹو زرداری اور دیگر سیاسی قیادت کا شکریہ ادا کرتے ہوئے کہا کہ قومی یکجہتی اور دانشمندانہ سفارت کاری نے اس عمل کو کامیاب بنانے میں اہم کردار ادا کیا۔
انہوں نے امریکا کے صدر ڈونلڈ ٹرمپ، ایران کی قیادت، قطر کے امیر، سعودی ولی عہد محمد بن سلمان، ترکیہ کے صدر اور چین کے صدر کی کاوشوں کو بھی سراہا۔ وزیراعظم کے مطابق ان تمام رہنماؤں نے مذاکراتی عمل کو کامیاب بنانے میں مثبت کردار ادا کیا۔
شہباز شریف نے فیلڈ مارشل عاصم منیر کی کوششوں کا خصوصی ذکر کرتے ہوئے کہا کہ انہوں نے قیام امن کے لیے دن رات کام کیا اور مشکل ترین مراحل میں بھی مذاکراتی عمل کو آگے بڑھانے میں اہم کردار ادا کیا۔
وزیراعظم کا کہنا تھا کہ جنگی صورتحال نے عالمی معیشت سمیت پاکستان کی معیشت پر بھی دباؤ ڈالا، تاہم امن معاہدے کے بعد عالمی اقتصادی استحکام کے مثبت اثرات سامنے آئیں گے اور پاکستان بھی اس کے ثمرات حاصل کرے گا۔
انہوں نے امید ظاہر کی کہ جنیوا میں ہونے والی تقریب عالمی امن، استحکام اور سفارتی تعاون کے ایک نئے دور کا آغاز ثابت ہوگی۔
