اسلام آباد: فنانس ایکٹ 2026 گاڑیاں سے متعلق نئی ٹیکس پالیسی نافذ کر دی گئی ہے، جس کے تحت یکم جولائی 2026 سے درآمدی گاڑیوں پر خصوصی ایکسائز ڈیوٹی کا اطلاق شروع ہو گیا ہے۔ نئی پالیسی کے بعد بعض الیکٹرک گاڑیوں کی قیمتوں میں کمی جبکہ لگژری اور بڑی انجن والی گاڑیوں کی قیمتوں میں نمایاں اضافے کا امکان ظاہر کیا جا رہا ہے۔
فیڈرل بورڈ آف ریونیو (ایف بی آر) کی جانب سے جاری ایس آر او 1072(I)/2026 کے مطابق خصوصی ایکسائز ڈیوٹی کسٹمز کلیئرنس کے وقت وصول کی جائے گی۔ اس اقدام کا مقصد درآمدی گاڑیوں پر ٹیکس نظام میں تبدیلی لانا اور حکومتی محصولات میں اضافہ کرنا ہے۔
کون سی گاڑیاں سستی ہوں گی؟
حکومت کے ٹیرف ریشنلائزیشن پلان کے تحت کئی مسافر گاڑیوں پر کسٹمز ڈیوٹی میں کمی کی گئی ہے، جس سے بعض درآمدی گاڑیوں کی قیمتیں کم ہونے کی توقع ہے۔
اسی طرح بیرون ملک سے درآمد کی جانے والی مکمل تیار شدہ الیکٹرک کاریں اور الیکٹرک ایس یو ویز، جن کی مالیت 75 ہزار امریکی ڈالر تک ہے، انہیں نئی خصوصی ایکسائز ڈیوٹی سے استثنیٰ دیا گیا ہے۔ ماہرین کے مطابق اس فیصلے سے اس کیٹیگری کی گاڑیاں نسبتاً سستی ہو سکتی ہیں۔
کن گاڑیوں کی قیمت بڑھے گی؟
نئی پالیسی کے تحت 75 ہزار سے 110 ہزار امریکی ڈالر تک مالیت رکھنے والی درآمدی الیکٹرک کاروں اور ایس یو ویز پر 30 فیصد خصوصی ایکسائز ڈیوٹی عائد کر دی گئی ہے، جبکہ 110 ہزار امریکی ڈالر سے زائد قیمت والی الیکٹرک گاڑیوں پر 40 فیصد ڈیوٹی لاگو ہوگی۔
اس کے علاوہ 2000 سی سی سے 3000 سی سی تک انجن رکھنے والی درآمدی کاروں، ایس یو ویز، اسٹیشن ویگنز، ڈبل کیبن پک اپس اور ریسنگ گاڑیوں پر 86 فیصد خصوصی ایکسائز ڈیوٹی مقرر کی گئی ہے۔
3000 سی سی سے زائد انجن والی درآمدی گاڑیوں پر یہ شرح بڑھا کر 92 فیصد کر دی گئی ہے، جس کے باعث ان گاڑیوں کی قیمتوں میں نمایاں اضافہ متوقع ہے۔
ماہرین کی رائے
معاشی ماہرین کے مطابق اگرچہ حکومت نے بعض درآمدی گاڑیوں پر کسٹمز ڈیوٹی میں کمی کی ہے، تاہم لگژری اور بڑی انجن والی گاڑیوں پر عائد نئی خصوصی ایکسائز ڈیوٹی قیمتوں میں کمی کے اثرات کو محدود کر سکتی ہے۔ ان کا کہنا ہے کہ نئی ٹیکس پالیسی کے بعد مہنگی درآمدی گاڑیوں کی قیمتوں میں لاکھوں بلکہ بعض صورتوں میں کروڑوں روپے تک اضافہ ہو سکتا ہے۔
