بہتر صحت کیلئے سپلیمنٹس کا استعمال دنیا بھر میں تیزی سے بڑھ رہا ہے، تاہم طبی ماہرین کا کہنا ہے کہ ان کا استعمال صرف ضرورت، مناسب تشخیص اور ڈاکٹر کے مشورے سے ہی کیا جانا چاہیے۔ ماہرین کے مطابق سپلیمنٹس متوازن غذا کا متبادل نہیں بلکہ جسم میں ضروری غذائی اجزاء کی کمی پوری کرنے کا ایک ذریعہ ہیں۔
ماہرینِ صحت نے چھ ایسے سپلیمنٹس کی نشاندہی کی ہے جو مخصوص حالات میں انسانی صحت کے لیے مفید ثابت ہو سکتے ہیں۔
میگنیشیئم بہتر نیند، قبض، سر درد اور بلڈ پریشر کو متوازن رکھنے میں مددگار سمجھا جاتا ہے۔ ماہرین کے مطابق میگنیشیئم گلائسینیٹ اور سائٹریٹ دیگر اقسام کے مقابلے میں جسم میں بہتر طریقے سے جذب ہوتے ہیں۔
وٹامن بی 12 خاص طور پر سبزی خور افراد، عمر رسیدہ لوگوں اور میٹفارمن یا معدے کی تیزابیت کم کرنے والی ادویات استعمال کرنے والوں کے لیے اہم ہے۔ اس وٹامن کی کمی اعصابی نظام اور خون کے خلیات کی صحت کو متاثر کر سکتی ہے۔
وٹامن ڈی ہڈیوں، پٹھوں اور مدافعتی نظام کو مضبوط رکھنے میں اہم کردار ادا کرتا ہے۔ سورج کی روشنی کی کمی یا دیگر طبی وجوہات کی بنا پر بہت سے افراد اس وٹامن کی کمی کا شکار ہو سکتے ہیں۔
اومیگا تھری (Omega-3) ان افراد کے لیے مفید سمجھا جاتا ہے جو اپنی غذا میں چکنائی والی مچھلی کم استعمال کرتے ہیں۔ تحقیق کے مطابق یہ خون میں بعض نقصان دہ چکنائیوں کو کم کرنے میں مدد دے سکتا ہے۔
کریئیٹین مونوہائیڈریٹ ورزش کرنے والے افراد اور کھلاڑیوں میں مقبول سپلیمنٹ ہے۔ ماہرین کے مطابق مناسب ورزش کے ساتھ اس کا استعمال جسمانی طاقت اور کارکردگی بہتر بنانے میں معاون ثابت ہو سکتا ہے۔
اسی طرح اسپغول کا چھلکا (Psyllium Husk) قبض سے نجات، آنتوں کی بہتر صحت اور مضر کولیسٹرول میں کمی کے لیے مفید سمجھا جاتا ہے، بشرطیکہ اسے مناسب مقدار میں استعمال کیا جائے۔
ماہرین نے اس بات پر زور دیا ہے کہ بہتر صحت کیلئے سپلیمنٹس کا استعمال خود سے شروع کرنے کے بجائے پہلے طبی مشورہ ضرور لیا جائے، کیونکہ ہر فرد کی جسمانی ضروریات مختلف ہوتی ہیں۔ متوازن غذا، باقاعدہ ورزش اور صحت مند طرزِ زندگی اب بھی اچھی صحت کی بنیادی شرط ہیں۔
