لاہور: پاکستان شوبز انڈسٹری کی معروف اداکارہ اداکارہ میرا معاوضہ سے متعلق اپنے تازہ بیان کے بعد ایک بار پھر خبروں کی زینت بن گئی ہیں۔ اداکارہ نے دعویٰ کیا ہے کہ وہ سرکاری فنڈز سے بننے والی فلموں میں کام کرنے کے لیے 50 لاکھ روپے معاوضہ وصول کرتی ہیں، جبکہ اگر حکومت نقد ادائیگی نہ کر سکے تو انہیں سنیما گھروں کی ملکیت بھی دی جا سکتی ہے۔
حال ہی میں ایک انٹرویو کے دوران گفتگو کرتے ہوئے میرا نے اپنے معاوضے سے متعلق کھل کر اظہار خیال کیا۔ ان کا کہنا تھا کہ اگر کسی سرکاری منصوبے کے تحت فلم بنائی جائے تو ان کی فیس 50 لاکھ روپے ہے۔
اداکارہ نے مزید کہا کہ اگر کسی وجہ سے حکومت کے لیے نقد ادائیگی ممکن نہ ہو تو اس کے متبادل کے طور پر ایک یا دو سنیما گھروں کی ملکیت بھی دی جا سکتی ہے۔ ان کے مطابق اس طرح فلمی صنعت کو بھی فائدہ پہنچے گا اور سنیما کلچر کو فروغ ملے گا۔
فلمی صنعت میں سرمایہ کاری کی ضرورت
میرا کا کہنا تھا کہ پاکستان کی فلمی صنعت کو ترقی دینے کے لیے صرف اچھی فلمیں بنانا کافی نہیں بلکہ جدید سنیما گھروں، بہتر انفراسٹرکچر اور سرمایہ کاری کی بھی اشد ضرورت ہے۔ ان کے مطابق اگر فلمی شعبے میں مؤثر سرمایہ کاری کی جائے تو مقامی سینما دوبارہ اپنے عروج پر آ سکتا ہے۔
ویڈیو کلپ سوشل میڈیا پر وائرل
اداکارہ کے انٹرویو کا مختصر ویڈیو کلپ سوشل میڈیا پر وائرل ہونے کے بعد صارفین کی جانب سے مختلف آراء سامنے آ رہی ہیں۔ بعض صارفین نے میرا کے بیان کو دلچسپ قرار دیا، جبکہ کچھ نے ان کے معاوضے اور سنیما گھروں سے متعلق تجویز پر حیرت کا اظہار کیا۔
واضح رہے کہ اداکارہ میرا ماضی میں بھی اپنے منفرد بیانات اور انٹرویوز کی وجہ سے اکثر خبروں میں رہتی ہیں، اور ان کے بیانات سوشل میڈیا پر تیزی سے وائرل ہوتے رہے ہیں۔
