نیویارک: تیل کی قیمتوں میں کمی ریکارڈ کی گئی ہے، جہاں امریکہ اور ایران کے درمیان بڑھتی ہوئی کشیدگی اور حالیہ حملوں کے باوجود عالمی منڈی میں خام تیل کے نرخ تقریباً دو فیصد کم ہو گئے۔ تازہ کاروباری سیشن کے دوران خام تیل کی قیمت تقریباً 76 ڈالر فی بیرل تک آ گئی۔
رپورٹس کے مطابق رواں ہفتے امریکہ اور ایران کے درمیان دوبارہ کشیدگی بڑھنے سے عالمی تیل مارکیٹ میں بے یقینی پیدا ہوئی تھی، جس کے باعث خام تیل کی قیمت تقریباً 70 ڈالر فی بیرل سے بڑھ کر برینٹ آئل کے لیے 79 ڈالر فی بیرل تک جا پہنچی تھی۔
تجزیہ کاروں کے مطابق امریکی صدر ڈونلڈ ٹرمپ کے ایران سے متعلق معاہدہ ختم ہونے کے بیان کے بعد سرمایہ کاروں میں تشویش بڑھی، جس کے نتیجے میں تیل کی قیمتوں میں عارضی اضافہ دیکھا گیا۔
ماہرین کا کہنا ہے کہ تیل کی قیمتوں میں کمی کے باوجود مشرق وسطیٰ کی صورتحال بدستور عالمی توانائی مارکیٹ کے لیے اہم خطرہ بنی ہوئی ہے۔ آبنائے ہرمز میں بحری جہازوں کو نشانہ بنانے کے واقعات کے بعد یہ خدشات پیدا ہوئے کہ اگر اس اہم بحری گزرگاہ میں رکاوٹ آئی تو عالمی سطح پر تیل کی سپلائی متاثر ہو سکتی ہے۔
مارکیٹ اعداد و شمار کے مطابق برینٹ خام تیل تقریباً 79 ڈالر فی بیرل جبکہ امریکی ویسٹ ٹیکساس انٹرمیڈیٹ (WTI) خام تیل تقریباً 74 ڈالر فی بیرل کی سطح پر ٹریڈ کرتا رہا۔ یہ قیمتیں جون کے وسط میں ریکارڈ ہونے والی سطح کے قریب ہیں، جب ایران اور امریکہ کے درمیان عارضی سفارتی پیش رفت کے باعث مارکیٹ میں استحکام آیا تھا۔
اقتصادی ماہرین کے مطابق آئندہ چند روز میں مشرق وسطیٰ کی صورتحال، آبنائے ہرمز میں جہاز رانی اور عالمی طلب و رسد کے رجحانات تیل کی قیمتوں کی سمت کا تعین کریں گے۔
