پشاور: وزیر اعلیٰ خیبرپختونخوا علی امین گنڈاپور نے واضح کیا ہے کہ وفاداریاں بدلنے والوں کو کسی صورت نہیں چھوڑا جائے گا۔ اپنے ایک بیان میں انہوں نے کہا کہ “جنہوں نے اپنی وفاداریاں بدلیں، ان سے حساب لیا جائے گا، ہم انہیں چھوڑیں گے نہیں، اور یہ معاملہ اتنے آرام سے ہضم نہیں ہونے دیں گے۔”
گنڈاپور نے اس بات پر زور دیا کہ موجودہ حکومت کا مینڈیٹ جعلی ہے اور اس نے عدلیہ پر حملہ کرنے کی کوشش کی ہے۔ انہوں نے کہا، “اگر مرضی کے بندے بٹھا کر فیصلے کیے جائیں گے تو یہ ادارے آگے نہیں بڑھیں گے۔” ان کا اشارہ ان غیر آئینی اقدامات کی طرف تھا جنہیں انہوں نے رات کے اندھیرے میں کیا گیا قرار دیا۔
وزیر اعلیٰ نے مزید کہا کہ “یہ غیر آئینی ترمیم صرف اشرافیہ کے مفادات کو تحفظ دینے کے لیے کی گئی ہے۔” انہوں نے اس بات پر زور دیا کہ یہ صورتحال عوام کے حقوق کے لیے خطرہ بن سکتی ہے اور اس کے خلاف آواز اٹھانے کی ضرورت ہے۔
علی امین گنڈاپور نے اپنے پیغام میں واضح کیا کہ عوام کی خدمت اور ان کے حقوق کا تحفظ ان کی حکومت کی پہلی ترجیح ہے۔ انہوں نے عوام کو یقین دلایا کہ وہ وفاداریاں بدلنے والوں کے خلاف قانونی کارروائی کریں گے اور ان کے خلاف سختی سے نمٹیں گے۔
