اسلام آباد(نیوز ڈیسک)پاکستان انٹرنیشنل ایئر لائنز (پی آئی اے) نے موجودہ چیف ایگزیکٹیو آفیسر (سی ای او) عامر حیات کی مدت ملازمت ختم ہونے پر نئے سربراہ کی تقرری کا عمل شروع کر دیا ہے۔
ایئر لائن کی طرف سے جاری کردہ اشتہار کے مطابق اہل امیدواروں کی عمر 45 سے 57 سال کے درمیان ہونی چاہیے جس میں بڑی تنظیموں کے انتظام کا 20 سال کا تجربہ یا ہوا بازی کی صنعت میں کم از کم 10 سالہ تجربہ ہونا ضروری ہے۔
دلچسپی رکھنے والے امیدواروں کے پاس اپنی درخواستیں جمع کرانے کے لیے اشتہار کی اشاعت سے 15 دن کا وقت ہے۔
دریں اثنا پنجاب حکومت پی آئی اے کے حصول میں اپنی ابتدائی دلچسپی سے پیچھے ہٹ گئی ہے۔ پنجاب کی وزیر اطلاعات عظمیٰ بخاری نے واضح کردیا ہے کہ صوبائی حکومت کی جانب سے ایئر لائن کی ملکیت حاصل کرنے کا کوئی ارادہ نہیں ہے۔
دوسری جانب خیبرپختونخوا کے وزیر اعلیٰ علی امین گنڈا پور بلیو ورلڈ سٹی کنسورشیم کی جانب سے توقع سے کم بولی (10 ارب روپے) کے بعد قومی ایئر لائن کے لیے بولی لگانے کے لیے پرعزم ہیں۔
مزیدپڑھیں:مائیکروسافٹ کا روس، چین اور ایران پر سائبر جرائم میں ملوث گروہوں کیساتھ گٹھ جوڑ کا الزام
