کراچی میں سعودی عرب سے بے دخل پاکستانی خاتون کو وفاقی تحقیقاتی ادارے نے ہوائی اڈے پر حراست میں لے لیا۔ حکام کے مطابق خاتون کو غیر اخلاقی سرگرمیوں میں ملوث ہونے پر واپس بھیجا گیا اور پہنچتے ہی کارروائی کی گئی۔
امیگریشن حکام کے مطابق خاتون کو جناح بین الاقوامی ہوائی اڈہ پر اس وقت روکا گیا جب وہ سعودی عرب سے واپس پہنچی۔ دوران جانچ اس کا رویہ مشکوک پایا گیا جس پر مزید تفتیش شروع کی گئی۔
تحقیقات کے دوران خاتون نے بتایا کہ اس کا تعلق بہاولپور سے ہے اور بیرون ملک جانے کیلئے فیصل آباد کے ایک ایجنٹ نے مدد فراہم کی۔ اس نے انکشاف کیا کہ وہاں پہنچنے کے بعد اسے ایک منظم انسانی اسمگلنگ گروہ کے حوالے کر دیا گیا۔
حکام کے مطابق مقامی عدالت کی کارروائی کے بعد خاتون کو سزا دی گئی اور بعد ازاں پاکستان واپس بھیج دیا گیا۔ وفاقی تحقیقاتی ادارہ نے خاتون کو تحویل میں لے کر مزید قانونی کارروائی شروع کر دی ہے جبکہ دیگر ملوث افراد کی گرفتاری کیلئے چھاپے بھی مارے جا رہے ہیں۔ حکام کا کہنا ہے کہ سعودی عرب سے بے دخل پاکستانی خاتون کے معاملے کی مکمل چھان بین جاری ہے۔
