وفاقی حکومت نے پاور سیکٹر میں ایک بڑا فیصلہ کرتے ہوئے تین اہم بجلی تقسیم کار کمپنیوں کی نجکاری کی منظوری دے دی ہے۔ بجلی تقسیم کار کمپنیوں کی نجکاری کے تحت آئیسکو، گیپکو اور فیسکو کے حصص نجی شعبے کو فروخت کیے جائیں گے۔
یہ فیصلہ ڈپٹی وزیرِ اعظم و وزیرِ خارجہ اسحاق ڈار کی زیر صدارت کابینہ کمیٹی برائے نجکاری کے اجلاس میں کیا گیا، جس میں پاور سیکٹر کی کارکردگی اور مالی مسائل پر تفصیلی غور کیا گیا۔
اعلامیے کے مطابق کمیٹی نے تینوں ڈسکوز کے ٹرانزیکشن اسٹرکچر کی منظوری دے دی ہے۔ منصوبے کے تحت ہر کمپنی کے 51 سے 100 فیصد تک حصص اور انتظامی کنٹرول نجی شعبے کو منتقل کیا جائے گا۔
حکومتی ذرائع کے مطابق بجلی تقسیم کار کمپنیوں کی نجکاری کا مقصد پاور سیکٹر میں اصلاحات لانا، کارکردگی بہتر بنانا اور مالی خسارے کو کم کرنا ہے۔ حکومت کا کہنا ہے کہ نجی شعبے کی شمولیت سے نہ صرف نظام بہتر ہوگا بلکہ صارفین کو بھی زیادہ مؤثر سہولیات میسر آئیں گی۔
اجلاس میں اسحاق ڈار نے کہا کہ نجکاری کا بنیادی مقصد بجلی کی ترسیل کے نظام کو مضبوط بنانا اور شعبے کو مالی طور پر خود کفیل کرنا ہے۔ ان کے مطابق اس اقدام سے انتظامی بہتری اور سروس ڈیلیوری میں واضح فرق آئے گا۔
اجلاس میں وفاقی وزیر توانائی، مشیر برائے نجکاری، سیکریٹری پاور ڈویژن، چیئرمین نیپرا اور دیگر اعلیٰ حکام نے بھی شرکت کی۔
