اسلام آباد(رضوان عباسی ): پاکستان ازبکستان اقتصادی روڈ میپ کے تحت دونوں ممالک کے درمیان معاشی شراکت داری کو مزید مضبوط بنانے کی تیاریاں مکمل کر لی گئی ہیں۔ ذرائع کے مطابق ازبکستان کے نائب وزیراعظم جمشید خوجایوف کے آئندہ دورۂ پاکستان کے دوران پانچ سالہ اقتصادی تعاون کے روڈ میپ پر دستخط متوقع ہیں، جس سے تجارت، سرمایہ کاری اور علاقائی رابطوں میں نئی پیش رفت کی امید ہے۔
ذرائع کے مطابق وزیراعظم شہباز شریف کی زیر صدارت ایک اعلیٰ سطحی جائزہ اجلاس منعقد ہوا، جس میں ازبکستان کے نائب وزیراعظم کے 20 اور 21 جولائی کو ہونے والے دورۂ پاکستان کی تیاریوں اور دوطرفہ تعاون سے متعلق مختلف امور کا تفصیلی جائزہ لیا گیا۔
روڈ اور ریل رابطوں پر خصوصی توجہ
اجلاس میں دونوں ممالک کے درمیان سڑک اور ریلوے رابطوں کو مزید مؤثر بنانے، ٹرانسپورٹ راہداریوں کی استعداد کار میں اضافے اور لاجسٹکس کے بنیادی ڈھانچے کو مضبوط بنانے سے متعلق مختلف تجاویز پر غور کیا گیا۔
حکام کا کہنا ہے کہ پاکستان ازبکستان اقتصادی روڈ میپ دونوں ممالک کے درمیان تجارتی سرگرمیوں کو وسعت دینے اور وسطی ایشیا تک رسائی کے نئے مواقع پیدا کرنے میں اہم کردار ادا کرے گا۔
متعدد معاہدوں اور ایم او یوز پر بھی اتفاق
ذرائع کے مطابق پاکستان اور ازبکستان کے درمیان مختلف شعبوں میں متعدد معاہدوں اور مفاہمت کی یادداشتوں (ایم او یوز) پر بھی اتفاقِ رائے ہو چکا ہے، جنہیں ازبک وفد کے دورے کے دوران حتمی شکل دیے جانے کا امکان ہے۔
پاک۔ازبک بزنس فورم بھی منعقد ہوگا
دورے کے موقع پر پاک۔ازبک بزنس ٹو بزنس فورم بھی منعقد کیا جائے گا، جس میں ازبکستان کی 100 سے زائد بڑی کمپنیاں شرکت کریں گی۔
فورم میں زراعت، ادویات، ٹرانسپورٹ، لاجسٹکس، صنعت اور دیگر اہم شعبوں میں سرمایہ کاری، مشترکہ منصوبوں اور تجارتی تعاون کے نئے امکانات پر تفصیلی تبادلہ خیال کیا جائے گا۔
ماہرین کے مطابق اس دورے سے دونوں ممالک کے درمیان اقتصادی تعلقات مزید مستحکم ہونے اور سرمایہ کاری کے نئے دروازے کھلنے کی توقع ہے۔
