عیدالاضحیٰ کے موقع پر ٹریفک کے بڑھتے دباؤ اور ممکنہ حادثات کے پیش نظر نیشنل ہائی وے اینڈ موٹر وے پولیس نے بڑا فیصلہ کرتے ہوئے موٹر ویز پر پابندی نافذ کر دی ہے۔
ترجمان موٹر وے پولیس کے مطابق جانوروں سے لدی گاڑیوں کو موٹر ویز پر داخل ہونے کی مکمل اجازت نہیں ہوگی۔ یہ اقدام عید کے دنوں میں ٹریفک کی روانی برقرار رکھنے اور حادثات کے خطرات کم کرنے کیلئے کیا گیا ہے۔
حکام کا کہنا ہے کہ مویشی منڈیوں سے قربانی کے جانور لے جانے والی گاڑیوں کی بڑی تعداد موٹر ویز کا رخ کرتی ہے، جس سے نہ صرف اوورلوڈنگ ہوتی ہے بلکہ ٹریفک جام اور حادثات کے امکانات بھی بڑھ جاتے ہیں۔ اسی صورتحال کے پیش نظر موٹر ویز پر پابندی کا فیصلہ کیا گیا ہے۔
موٹر وے پولیس نے ہدایت کی ہے کہ ایسی گاڑیاں قومی اور صوبائی سڑکوں کا استعمال کریں۔ ساتھ ہی پنجاب اور خیبرپختونخوا پولیس کو موٹر ویز کے داخلی راستوں پر خصوصی چیک پوسٹس قائم کرنے کی ہدایت بھی جاری کی گئی ہے۔
مزید کہا گیا ہے کہ مویشی منڈیوں اور انٹرچینجز کے اطراف غیر قانونی پارکنگ کرنے والی گاڑیوں کے خلاف بھی سخت کارروائی کی جائے گی تاکہ ٹریفک نظام متاثر نہ ہو۔
حکام کے مطابق یہ اقدامات شہریوں کی حفاظت اور ٹریفک کے بہتر انتظام کیلئے ناگزیر ہیں، خاص طور پر عیدالاضحیٰ کے موقع پر جب سڑکوں پر رش معمول سے زیادہ ہوتا ہے۔
