کراچی: سونے کی قیمت میں کمی کا سلسلہ جاری ہے اور عالمی منڈی میں شدید فروخت کے دباؤ کے بعد پاکستان میں بھی سونے اور چاندی کے نرخوں میں نمایاں کمی ریکارڈ کی گئی ہے۔
آل پاکستان جیمز اینڈ جیولرز صرافہ ایسوسی ایشن کے مطابق مقامی مارکیٹ میں فی تولہ سونے کی قیمت 14 ہزار 900 روپے کم ہو کر 4 لاکھ 38 ہزار 36 روپے پر آ گئی ہے۔ اسی طرح 10 گرام سونے کی قیمت میں 13 ہزار 410 روپے کی کمی کے بعد نئی قیمت 3 لاکھ 74 ہزار 205 روپے مقرر کی گئی ہے۔
عالمی بلین مارکیٹ میں بھی سونے کے نرخوں میں نمایاں گراوٹ دیکھی گئی، جہاں فی اونس سونے کی قیمت 149 ڈالر کم ہو کر 4 ہزار 156 ڈالر تک پہنچ گئی۔ ماہرین کے مطابق عالمی سطح پر فروخت کے دباؤ اور سرمایہ کاروں کی بدلتی حکمت عملی نے قیمتوں میں کمی کی راہ ہموار کی۔
دوسری جانب چاندی کی قیمتوں میں بھی واضح کمی سامنے آئی ہے۔ مقامی مارکیٹ میں فی تولہ چاندی 413 روپے سستی ہو کر 6 ہزار 946 روپے کی سطح پر آ گئی، جبکہ 10 گرام چاندی کی قیمت 373 روپے کمی کے بعد 5 ہزار 895 روپے ہوگئی۔
ماہرین کا کہنا ہے کہ اگر عالمی مارکیٹ میں یہی رجحان برقرار رہا تو آنے والے دنوں میں مزید کمی بھی دیکھی جا سکتی ہے۔ تاہم سرمایہ کاروں کو عالمی معاشی صورتحال اور قیمتی دھاتوں کی طلب پر بھی نظر رکھنی چاہیے۔
