آزاد جموں و کشمیر حکومت نے آزاد کشمیر کاروباری اوقات سے متعلق اہم فیصلہ کرتے ہوئے مارکیٹوں، شاپنگ مالز، ہوٹلوں اور ریسٹورنٹس کیلئے عائد وقت کی پابندیاں عارضی طور پر ختم کر دی ہیں۔
حکومت کی جانب سے جاری نوٹیفکیشن کے مطابق یہ نرمی یکم جون 2026 تک نافذ العمل رہے گی۔ اس فیصلے کے بعد تجارتی مراکز اور کاروباری سرگرمیاں رات گئے تک جاری رکھی جا سکیں گی، جبکہ اپریل 2026 میں جاری کیے گئے پہلے کے احکامات کو بھی معطل کر دیا گیا ہے۔
حکام کے مطابق اس اقدام کا مقصد کاروباری سرگرمیوں کو فروغ دینا اور تاجروں و عوام کو سہولت فراہم کرنا ہے۔ نئی ہدایات کے تحت شاپنگ مالز، تھوک مارکیٹیں، دکانیں، ہوٹل، گیسٹ ہاؤسز، ریسٹورنٹس، کیفے اور مقامی ڈھابے رات دیر تک کھلے رہ سکیں گے۔
ذرائع کا کہنا ہے کہ آزاد کشمیر کاروباری اوقات میں نرمی سے نہ صرف مقامی کاروبار کو فائدہ پہنچے گا بلکہ سیاحتی شعبے میں بھی بہتری متوقع ہے۔ حکومت کا ماننا ہے کہ سیاحوں کو ہر وقت خوراک اور رہائش کی سہولت دستیاب ہونے سے خطے میں سیاحت کو فروغ ملے گا۔
کاروباری برادری نے حکومتی فیصلے کا خیر مقدم کرتے ہوئے کہا ہے کہ وقت کی پابندیوں کے خاتمے سے تجارتی سرگرمیوں میں اضافہ ہوگا اور تاجروں کو معاشی ریلیف ملے گا۔
واضح رہے کہ قبل ازیں حکومت نے توانائی بچت اور دیگر انتظامی وجوہات کی بنیاد پر کاروباری اوقات محدود کر دیے تھے، تاہم اب عوامی سہولت اور تجارتی ضرورت کو مدنظر رکھتے ہوئے ان پابندیوں میں عارضی نرمی کی گئی ہے۔
