استور ، طوفانی سیلاب نے تباہی مچادی، متعدد سیاح پھنس گئے، زرعی زمینیں بہہ گئیں

گلگت(نیوزڈیسک) موسلا دھار بارشوں نے استور بھر میں سیلابی ریلوں کو جنم دیا ہے، جس سے بنیادی ڈھانچے اور زرعی زمینوں کو بڑے پیمانے پر نقصان پہنچا ہے، اور بہت سے رہائشی اور مسافر پھنسے ہوئے ہیں۔ریسکیو 1122 کے میڈیا کوآرڈینیٹر وزیر اسد علی کے مطابق غیر معمولی بارش نے پورے خطے میں تباہی مچا دی

، استور-گوری کوٹ روڈ سیلاب سے شدید متاثر، ، سیلابی ریلے نے پانچ مختلف مقامات پر تباہی پھیلادی ، علاقے کے مکین محصور ہوکررہ گئے۔سیلاب سےزرعی شعبے کو شدید متاثر کردیا، کھڑی فصلیں تباہ، درخت جڑوں سے اکھڑ گئے جس سے مقامی کسانوں کو لاکھوں روپے کا نقصان اٹھانا پڑا ۔

عیدگاہ کے علاقے میں، تین مکانات کو نقصان پہنچا جبکہ بلون گاؤں میں کھڑی فصلیں اور زرعی زمین تباہ ہوگئی۔ سیلاب نے بنیادی ڈھانچے کو بھی شدید نقصان پہنچایا، بولن کے علاقے تک مرکزی استور سڑک کو عارضی طور پر ٹریفک کیلئے تو بحال کر دیا تاہم، علاقے میں پلوں کو پہنچنے والے نقصان کی وجہ سے فینا میں سڑک بند ہونے سے علاقہ مکین محصور ہوگئے۔

استور کو فینا سے ملانے والے پل کو شدید نقصان پہنچا جو مکمل طور پر تباہ ہو گیا۔ لکڑی کا ڈھانچہ بہہ گیا، اور ملحقہ آر سی سی پل کے ایک طرف کو شدید نقصان پہنچا، جس سے علاقہ مزید الگ تھلگ ہوگیا۔ ریسکیو ٹیمیں فینا پل پر عارضی سیڑھیوں کے ڈھانچے کا استعمال کرتے ہوئے سیاحوں اور مریضوں سمیت پھنسے ہوئے افراد کو نکالنے کے لیے کام کر رہی ہیں۔

وزیر اسد علی نے مزید انکشاف کیا کہ تین ہفتوں سے جاری سیلاب نے پکوڑا اور کاشونت کے علاقوں کو بری طرح متاثر کیا ۔ جہاں دو بچے المناک طور پر جان کی بازی ہار گئے۔ مجموعی طور پر، کم از کم 44 مکانات، ایک نجی اسکول، اور ایک مسجد کو مختلف درجات کا نقصان پہنچا ہے، جس میں کم سے کم سے لے کر مکمل تباہی تک ہے۔ بے گھر ہونے والے مکین اس وقت رشتہ داروں کے ساتھ، امام بارگاہوں میں اور حکام کے فراہم کردہ خیموں میں پناہ لے رہے ہیں۔