لاہور (اوصاف نیوز) پنجاب بھر کے تعلیمی بورڈز نے سالانہ امتحانات کا باضابطہ شیڈول جاری کر دیا ہے، جس کے تحت میٹرک اور انٹرمیڈیٹ کے امتحانات اور نتائج کی تاریخیں واضح کر دی گئی ہیں۔
جاری کردہ شیڈول کے مطابق دسویں جماعت کے سالانہ امتحانات 27 مارچ سے شروع ہوں گے اور ان کے نتائج 6 اگست کو جاری کیے جائیں گے۔ نویں جماعت کے نتائج 2 ستمبر کو متوقع ہیں، جس سے طلبہ کو اگلی جماعت میں داخلے کی منصوبہ بندی میں آسانی ہوگی۔
انٹرمیڈیٹ یعنی گیارہویں اور بارہویں جماعت کے امتحانات 20 مئی سے شروع کیے جائیں گے، جبکہ بارہویں جماعت کے نتائج 23 ستمبر اور گیارہویں جماعت کے نتائج 22 اکتوبر کو جاری کیے جائیں گے۔
یہ شیڈول پنجاب کے تمام تعلیمی بورڈز پر یکساں طور پر لاگو ہوگا، جس میں لاہور، فیصل آباد، گوجرانوالہ، ملتان، بہاولپور، سرگودھا، ڈیرہ غازی خان، ساہیوال اور راولپنڈی سمیت دیگر بورڈز شامل ہیں۔
تعلیمی حکام نے کہا ہے کہ امتحانی مراکز، نگران عملہ اور سیکیورٹی انتظامات کو حتمی شکل دی جا رہی ہے تاکہ امتحانات شفاف اور پرامن ماحول میں منعقد کیے جا سکیں۔ والدین اور طلبہ کو ہدایت کی گئی ہے کہ بورڈز کی جانب سے جاری کردہ ہدایات پر عمل کریں اور کسی بھی افواہ پر توجہ نہ دیں۔
مزید پڑھیں:خوشخبری،سعودی عرب ورک ویزا کی نئی اپ ڈیٹ جانیں
