کراچی: کراچی میں گیس فراہمی کے مقررہ اوقات پر عملدرآمد نہ ہونے کے باعث شہری شدید مشکلات کا شکار ہو گئے ہیں۔ مختلف علاقوں کے رہائشیوں نے شکایت کی ہے کہ گیس کی فراہمی کے اعلان کردہ شیڈول پر مکمل طور پر عمل نہیں کیا جا رہا، جس سے گھریلو امور متاثر ہو رہے ہیں۔
صارفین کے مطابق حکومتی اعلان کے تحت صبح 6 بجے سے 10 بجے تک گیس کی فراہمی جاری رہنی چاہیے، تاہم متعدد علاقوں میں گیس صبح 7 بجے کے بعد بحال کی جاتی ہے جبکہ بعض مقامات پر مقررہ وقت سے پہلے ہی بند کر دی جاتی ہے۔
شہریوں کا کہنا ہے کہ کئی علاقوں میں گیس 10 بجے کے بجائے ساڑھے 9 بجے ہی بند کر دی جاتی ہے، جس کے باعث ناشتہ اور دیگر گھریلو ضروریات پوری کرنا مشکل ہو جاتا ہے۔ خاص طور پر خواتین کو کھانا پکانے اور بچوں کو اسکول بھیجنے کے اوقات میں شدید پریشانی کا سامنا کرنا پڑ رہا ہے۔
متاثرہ شہریوں نے الزام عائد کیا ہے کہ سوئی سدرن گیس کمپنی حکومتی ہدایات کے مطابق گیس فراہمی کو یقینی بنانے میں ناکام نظر آ رہی ہے۔ ان کا مطالبہ ہے کہ کمپنی اعلان کردہ شیڈول پر سختی سے عملدرآمد کرے تاکہ عوام کو مزید مشکلات کا سامنا نہ کرنا پڑے۔
ماہرین کے مطابق گرمیوں کے موسم میں بھی گیس کی غیر اعلانیہ لوڈشیڈنگ شہریوں کے لیے ایک بڑا مسئلہ بن چکی ہے۔ شہریوں نے متعلقہ حکام سے فوری نوٹس لینے اور کراچی میں گیس فراہمی کے نظام کو بہتر بنانے کا مطالبہ کیا ہے۔
دوسری جانب سوئی سدرن گیس کمپنی کی جانب سے تاحال اس حوالے سے کوئی باضابطہ وضاحت سامنے نہیں آئی۔
