کراچی: شہر قائد میں کئی روز سے جاری شدید گرمی کے بعد کراچی کا موسم نسبتاً خوشگوار ہو گیا ہے۔ سمندر کی جانب سے چلنے والی ٹھنڈی ہواؤں نے گرمی کی شدت میں واضح کمی کر دی ہے جس کے باعث شہریوں نے سکھ کا سانس لیا ہے۔
موسمی صورتحال کے مطابق آج شہر میں زیادہ سے زیادہ درجہ حرارت 33 سے 35 ڈگری سینٹی گریڈ کے درمیان رہنے کا امکان ہے۔ اگرچہ ہوا میں نمی کا تناسب اب بھی زیادہ ہے، تاہم سمندری ہواؤں کی مسلسل آمد سے موسم پہلے کی نسبت بہتر محسوس کیا جا رہا ہے۔
ماہرین کے مطابق نمی کی زیادہ شرح کی وجہ سے محسوس کیا جانے والا درجہ حرارت اصل درجہ حرارت سے کچھ زیادہ ہو سکتا ہے، لیکن مجموعی طور پر موسم میں نمایاں بہتری دیکھی جا رہی ہے۔ گزشتہ چند دنوں کے دوران شدید حبس اور گرمی سے پریشان شہریوں کے لیے یہ تبدیلی خوش آئند قرار دی جا رہی ہے۔
کراچی کا موسم آج رات مزید خوشگوار ہونے کی توقع ہے کیونکہ سمندری بادلوں کی تعداد میں اضافے کا امکان ظاہر کیا گیا ہے۔ موسمی جائزے کے مطابق رات گئے سے کل دوپہر تک مطلع جزوی طور پر ابر آلود رہ سکتا ہے۔
محکمہ موسمیات سے وابستہ ذرائع کا کہنا ہے کہ شہر کے بعض علاقوں میں ہلکی بوندا باندی یا پھوار پڑنے کے امکانات بھی موجود ہیں۔ سمندری بادلوں کی موجودگی کے باعث درجہ حرارت میں مزید کمی آ سکتی ہے۔
ماہرین کے مطابق رواں ہفتے کے دوران کراچی میں شدید گرمی کی لہر کا کوئی خطرہ نہیں جبکہ موسم مجموعی طور پر معتدل اور نسبتاً خوشگوار رہنے کی توقع ہے۔
