لاہور: پنجاب بجٹ 2026-27 کی پیشی کے تمام انتظامات مکمل کر لیے گئے ہیں اور صوبائی اسمبلی میں بجٹ آج 16 جون کو پیش کیا جائے گا۔ ذرائع کے مطابق پنجاب حکومت نے آئندہ مالی سال کے بجٹ کی تیاری مکمل کر لی ہے جبکہ بجٹ دستاویزات کو حتمی شکل دے دی گئی ہے۔
صوبائی وزیر خزانہ مجتبیٰ شجاع الرحمان پنجاب اسمبلی کے اجلاس میں پنجاب بجٹ 2026-27 پیش کریں گے۔ بجٹ اجلاس سے قبل صوبائی کابینہ کا اہم اجلاس بھی طلب کیا گیا ہے جس میں بجٹ تجاویز کی باقاعدہ منظوری دی جائے گی۔
ذرائع کا کہنا ہے کہ آئندہ مالی سال کے بجٹ میں سماجی شعبے کو خصوصی اہمیت دی گئی ہے۔ تعلیم، صحت اور عوامی فلاح و بہبود کے منصوبوں کے لیے زیادہ وسائل مختص کیے جانے کا امکان ہے تاکہ عوام کو براہ راست ریلیف فراہم کیا جا سکے۔
بجٹ سے متعلق سامنے آنے والی ابتدائی معلومات کے مطابق حکومت نے نئے ٹیکس عائد نہ کرنے کا فیصلہ کیا ہے، جس سے شہریوں اور کاروباری طبقے کو کچھ حد تک اطمینان ملنے کی توقع ہے۔ اس کے علاوہ سرکاری ملازمین کی تنخواہوں اور ریٹائرڈ ملازمین کی پنشن میں اضافے کی سفارش بھی شامل کی گئی ہے۔
ذرائع کے مطابق تنخواہوں اور پنشن میں اضافہ وفاقی بجٹ میں اعلان کردہ شرح کے مطابق رکھنے کی تجویز دی گئی ہے۔ وفاقی حکومت پہلے ہی سرکاری ملازمین کی تنخواہوں اور پنشن میں 7 فیصد اضافے کی تجویز دے چکی ہے۔
ماہرین کے مطابق اگر بجٹ میں ترقیاتی منصوبوں، سماجی شعبے اور سرکاری ملازمین کے لیے ریلیف اقدامات شامل کیے جاتے ہیں تو اس کے مثبت اثرات صوبے کی معیشت اور عوامی فلاح پر مرتب ہو سکتے ہیں۔
