لاہور:ذیشان روکھڑی نے انکشاف کیا ہے کہ انہوں نے فلم مکھو میں کام کرنے کی پیشکش صرف اس لیے قبول نہیں کی کیونکہ ان کے مطابق معاوضہ ان کی توقعات کے مطابق نہیں تھا۔ گلوکار نے ایک حالیہ انٹرویو میں فلم کے بجٹ اور فنکاروں کی فیس سے متعلق بھی اپنے خیالات کا اظہار کیا۔
ذیشان روکھڑی نے بتایا کہ انہیں فلم میں ایک کردار کی پیشکش کی گئی تھی، جس کے لیے انہوں نے آٹھ روزہ شوٹنگ کے عوض ایک کروڑ روپے معاوضہ طلب کیا تھا۔ تاہم بعد میں انہیں بتایا گیا کہ فلم میں مرکزی کردار ادا کرنے والے معمر رانا کو مبینہ طور پر صرف پانچ لاکھ روپے معاوضہ دیا جا رہا ہے۔
انہوں نے کہا کہ اگر واقعی ایسا ہے تو یہ ایک سینئر اور معروف اداکار کے شایانِ شان معاوضہ نہیں۔ ان کے مطابق کسی بھی فلمی صنعت کی ترقی کے لیے ضروری ہے کہ فنکاروں کی خدمات اور تجربے کی مناسب قدر کی جائے۔
ذیشان روکھڑی کا کہنا تھا کہ ممکن ہے فلم کے لیے دستیاب بجٹ محدود ہو، تاہم اگر پاکستانی فلم انڈسٹری کو بین الاقوامی سطح پر مضبوط بنانا اور بڑی فلمی صنعتوں سے مقابلہ کرنا ہے تو منصوبوں کے بجٹ اور فنکاروں کے معاوضے پر بھی سنجیدگی سے توجہ دینا ہوگی۔
فلم مکھو معروف اداکارہ اور ہدایت کارہ سنگیتا کی ہدایت کاری میں بن رہی ہے۔ اس منصوبے کا اعلان حال ہی میں کیا گیا تھا، جبکہ اس میں معمر رانا بھی اہم کردار ادا کر رہے ہیں۔
ذیشان روکھڑی کے ان بیانات کے بعد سوشل میڈیا پر مختلف آراء سامنے آ رہی ہیں۔ بعض صارفین کا کہنا ہے کہ پاکستانی فلم انڈسٹری میں بجٹ ایک بڑا مسئلہ ہے، جبکہ کچھ کا مؤقف ہے کہ معاوضہ فنکار کی موجودہ مارکیٹ ویلیو کے مطابق طے کیا جاتا ہے۔
واضح رہے کہ معمر رانا اور سنگیتا کی جانب سے ذیشان روکھڑی کے دعووں پر تاحال کوئی باضابطہ ردعمل سامنے نہیں آیا۔
