اسلام آباد: نادرا پاک آئی ڈی ایپ استعمال کرنے والے شہریوں کے لیے خوشخبری سامنے آگئی ہے۔ نیشنل ڈیٹابیس اینڈ رجسٹریشن اتھارٹی (نادرا) نے اپنی موبائل ایپ کا نیا ورژن جاری کر دیا ہے، جس میں گاڑیوں کی خریدوفروخت کے عمل کو مزید آسان اور محفوظ بنانے کے لیے نئی سہولیات شامل کی گئی ہیں۔
نادرا کی جانب سے جاری کردہ نادرا پاک آئی ڈی ایپ کے ورژن 5.6.8 میں حکومت بلوچستان کے تعاون سے بلوچستان میں رجسٹرڈ گاڑیوں کے ڈیجیٹل رجسٹریشن کارڈ اور گاڑیوں کی خریدوفروخت کے دوران بائیومیٹرک تصدیق کی سہولت متعارف کرائی گئی ہے۔
اس نئی سہولت کے ذریعے شہری اب متعلقہ تصدیقی عمل کے لیے دفاتر کے غیر ضروری چکر لگانے کے بجائے اپنے موبائل فون سے ہی کئی مراحل مکمل کر سکیں گے۔ اس اقدام کا مقصد گاڑیوں کی خریدوفروخت کے عمل کو زیادہ شفاف، محفوظ اور تیز رفتار بنانا ہے۔
نادرا کا کہنا ہے کہ ادارہ صرف شناختی کارڈ اور دیگر قومی دستاویزات تک محدود نہیں بلکہ جدید ڈیجیٹل سہولیات کے ذریعے عوام کو مختلف سرکاری خدمات بھی فراہم کر رہا ہے۔ پاک آئی ڈی ایپ میں مسلسل نئی سہولیات شامل کی جا رہی ہیں تاکہ شہریوں کو زیادہ سے زیادہ خدمات ایک ہی پلیٹ فارم پر دستیاب ہوں۔
حکام کے مطابق ابتدائی مرحلے میں یہ سہولت بلوچستان میں رجسٹرڈ گاڑیوں کے لیے متعارف کرائی گئی ہے، جبکہ مستقبل میں اس دائرہ کار کو مزید وسعت دینے کا امکان بھی موجود ہے۔
نادرا نے صارفین سے اپیل کی ہے کہ وہ پاک آئی ڈی ایپ کا تازہ ترین ورژن اپ ڈیٹ کریں تاکہ نئی ڈیجیٹل سہولیات سے فوری فائدہ اٹھایا جا سکے۔ ادارے نے صارفین سے یہ بھی کہا ہے کہ وہ آئندہ ورژنز میں شامل کی جانے والی نئی سہولیات کے حوالے سے اپنی تجاویز بھی فراہم کریں۔
