شدید گرمی میں موبائل فون کو محفوظ رکھنے کے طریقے جاننا آج ہر صارف کے لیے ضروری ہو گیا ہے، کیونکہ بلند درجہ حرارت اسمارٹ فون کی بیٹری، پراسیسر اور دیگر حساس پرزوں کو متاثر کر سکتا ہے۔ ٹیکنالوجی ماہرین کے مطابق چند آسان احتیاطی تدابیر اپنا کر نہ صرف فون کو نقصان سے بچایا جا سکتا ہے بلکہ اس کی کارکردگی اور عمر میں بھی اضافہ ممکن ہے۔
ماہرین کا کہنا ہے کہ بیشتر اسمارٹ فونز کو صفر سے 35 ڈگری سینٹی گریڈ تک کے درجہ حرارت میں بہترین کارکردگی کے لیے تیار کیا جاتا ہے۔ اگر فون کو زیادہ دیر تک براہِ راست دھوپ میں رکھا جائے یا شدید گرمی میں مسلسل استعمال کیا جائے تو بیٹری غیر معمولی طور پر گرم ہو سکتی ہے، جس سے پراسیسر کی رفتار کم ہونے کے ساتھ اندرونی پرزوں کو بھی نقصان پہنچنے کا خدشہ پیدا ہو جاتا ہے۔
اگر فون کی اسکرین پر “فون بہت زیادہ گرم ہو گیا ہے” جیسا انتباہ ظاہر ہو تو فوراً اس کا استعمال بند کر دینا چاہیے۔ یہ انتباہ اس بات کی علامت ہوتا ہے کہ فون کا حفاظتی نظام خود کو ممکنہ نقصان سے بچانے کی کوشش کر رہا ہے۔
ٹیکنالوجی ماہرین نے مشورہ دیا ہے کہ موبائل فون کو کبھی بھی بند گاڑی میں نہ چھوڑیں، کیونکہ چند منٹوں میں گاڑی کا اندرونی درجہ حرارت 50 ڈگری سینٹی گریڈ سے تجاوز کر سکتا ہے، جو بیٹری، اسکرین اور دیگر پرزوں کو شدید نقصان پہنچا سکتا ہے۔ اسی طرح کمزور سگنل والے علاقوں میں غیر ضروری استعمال سے گریز کریں، کیونکہ مسلسل نیٹ ورک تلاش کرنے سے بھی فون تیزی سے گرم ہوتا ہے۔
ماہرین کے مطابق پہلے سے گرم فون کو فوراً چارجنگ پر نہیں لگانا چاہیے۔ گرمیوں میں وائرلیس چارجنگ کے بجائے عام چارجر استعمال کرنا نسبتاً بہتر رہتا ہے، جبکہ گاڑی میں نیویگیشن کے لیے فون کو دھوپ میں ڈیش بورڈ پر رکھنے کے بجائے ٹھنڈی ہوا کے قریب رکھنا چاہیے۔
انہوں نے یہ بھی تجویز دی کہ توانائی بچانے والا موڈ فعال رکھیں، غیر ضروری بیک گراؤنڈ ایپس بند کریں اور فون کو براہِ راست سورج کی روشنی سے بچائیں۔ ہلکے رنگ کا موبائل کور استعمال کرنے سے بھی گرمی کم جذب ہوتی ہے، جس سے فون نسبتاً ٹھنڈا رہتا ہے۔
ماہرین نے خبردار کیا کہ اگر فون غیر معمولی حد تک گرم ہو جائے تو اسے فریج یا فریزر میں ہرگز نہ رکھیں، کیونکہ اچانک درجہ حرارت میں تبدیلی سے فون کے اندر نمی پیدا ہو سکتی ہے، جو الیکٹرانک سرکٹ کو نقصان پہنچا سکتی ہے۔ ایسی صورت میں فون بند کر کے کور اتار دیں اور اسے کسی ٹھنڈی، سایہ دار جگہ یا پنکھے کی ہوا میں قدرتی طور پر ٹھنڈا ہونے دیں۔
ٹیکنالوجی ماہرین کا کہنا ہے کہ ان آسان احتیاطی تدابیر پر عمل کر کے اسمارٹ فون کی کارکردگی بہتر رکھی جا سکتی ہے، بیٹری کی عمر میں اضافہ ممکن ہے اور گرمی کے موسم میں مہنگے فون کو ممکنہ نقصان سے بھی محفوظ رکھا جا سکتا ہے۔
