اسلام آباد: ملک میں آندھی اور بارشوں کی پیشگوئی کرتے ہوئے محکمہ موسمیات نے آئندہ 24 گھنٹوں کے دوران ملک کے مختلف علاقوں میں موسم کی صورتحال سے متعلق اہم الرٹ جاری کر دیا ہے۔ شہریوں کو غیر ضروری سفر سے گریز اور احتیاطی تدابیر اختیار کرنے کی ہدایت بھی کی گئی ہے۔
محکمہ موسمیات کے مطابق وفاقی دارالحکومت اسلام آباد میں مطلع جزوی طور پر ابر آلود رہنے کے ساتھ گرج چمک اور بارش کا امکان ہے۔ اسی طرح خیبرپختونخوا اور پنجاب کے مختلف اضلاع میں بھی تیز ہواؤں، آندھی اور بارش کی پیشگوئی کی گئی ہے، جس سے بعض علاقوں میں موسم خوشگوار ہونے کی توقع ہے۔
دوسری جانب سندھ کے بیشتر علاقوں میں شدید گرمی اور حبس برقرار رہنے کا امکان ظاہر کیا گیا ہے، جبکہ بلوچستان کے وسطی اضلاع میں بھی درجہ حرارت معمول سے زیادہ رہنے کی پیشگوئی کی گئی ہے۔
محکمہ موسمیات کا کہنا ہے کہ گلگت بلتستان کے مختلف علاقوں میں مطلع جزوی طور پر ابر آلود رہے گا اور کہیں کہیں بارش ہو سکتی ہے۔ اسی طرح آزاد کشمیر میں بھی تیز ہواؤں، گرج چمک اور بارش کی توقع ظاہر کی گئی ہے۔
ماہرین موسمیات کے مطابق بارش کے دوران شہری احتیاطی تدابیر اختیار کریں، خاص طور پر نشیبی علاقوں، کمزور عمارتوں اور بجلی کی کھلی تاروں سے دور رہیں۔ کسانوں اور مسافروں کو بھی موسم کی تازہ صورتحال پر نظر رکھنے کا مشورہ دیا گیا ہے۔
واضح رہے کہ ملک میں آندھی اور بارشوں کی پیشگوئی کے بعد متعلقہ اداروں کو الرٹ رہنے کی ہدایت کی گئی ہے تاکہ کسی بھی ہنگامی صورتحال سے بروقت نمٹا جا سکے۔
