نیویارک: ٹیلر سوئفٹ عروسی لباس سے متعلق نئی تفصیلات منظرِ عام پر آ گئی ہیں، جن کے مطابق امریکی سپر اسٹار گلوکارہ نے اپنی شادی کے موقع پر معروف فرانسیسی فیشن برانڈ ڈیور کا خصوصی تیار کردہ ہاٹ کٹیور ویڈنگ گاؤن زیب تن کیا۔
بین الاقوامی میڈیا رپورٹس کے مطابق یہ عروسی لباس ڈیور کے نئے کری ایٹو ڈائریکٹر نے ڈیزائن کیا، جو کسی عالمی شہرت یافتہ شخصیت کے لیے ان کا پہلا ہاٹ کٹیور ویڈنگ گاؤن قرار دیا جا رہا ہے۔
ذرائع کے مطابق اس گاؤن کی تیاری کے دوران ٹیلر سوئفٹ اور ان کے شوہر ٹریوس کیلسی سے قریبی مشاورت کی گئی تاکہ لباس ان کی شخصیت اور پسند کے مطابق تیار کیا جا سکے۔ اگرچہ شادی کی تقریب کے بعد بھی اس خصوصی گاؤن کی تصاویر باضابطہ طور پر جاری نہیں کی گئیں۔
رپورٹس میں بتایا گیا ہے کہ عروسی لباس کا ڈیزائن پریوں کی کہانیوں سے متاثر تھا، جس میں روایتی ہاٹ کٹیور کاریگری کو جدید فیشن کے عناصر کے ساتھ خوبصورتی سے یکجا کیا گیا۔
ٹیلر سوئفٹ نے اپنے عروسی لباس کے ساتھ خصوصی ڈیزائن کے جوتے، قیمتی زیورات اور اپنی منگنی کی ہیرے کی انگوٹھی بھی پہن رکھی تھی، جس نے ان کے دلہن کے انداز کو مزید منفرد بنا دیا۔
فیشن ماہرین کا کہنا ہے کہ ٹیلر سوئفٹ کا یہ عروسی انداز آئندہ برسوں میں ویڈنگ فیشن کے نئے رجحانات پر بھی اثر انداز ہو سکتا ہے، کیونکہ ان کے ملبوسات ہمیشہ دنیا بھر میں مداحوں اور فیشن انڈسٹری کی توجہ حاصل کرتے ہیں۔
