کوئٹہ(نیوز ڈیسک) بلوچستان حکومت نے سرکاری ملازمین کے لیے 7 فیصد ایڈہاک ریلیف الاؤنس کی منظوری دے دی۔
محکمہ خزانہ بلوچستان کی جانب سے جاری نوٹیفکیشن کے مطابق فیصلے کے تحت گریڈ ایک سے گریڈ 22 تک کے ریگولر سرکاری ملازمین اس ریلیف سے مستفید ہوں گے۔
اعلامیہ کے مطابق ایڈہاک ریلیف الاؤنس کا اطلاق یکم جولائی 2026 سے ہو گا، الاؤنس ملازمین کی رننگ بنیادی تنخواہ کی بنیاد پر ادا کیا جائے گا یعنی ہر ملازم کو موجودہ بنیادی تنخواہ کے مطابق 7 فیصد اضافی رقم ملے گی۔
محکمہ خزانہ کے اعلامیہ میں واضح کیا گیا ہے کہ ایڈہاک ریلیف الاؤنس انکم ٹیکس کے تابع ہو گا، قابل اطلاق قوانین کے مطابق الاؤنس کی رقم سے انکم ٹیکس کی کٹوتی کی جائے گی، تاہم اس الاؤنس کو مستقل بنیادی تنخواہ کا حصہ تصور نہیں کیا جائے گا اور ادائیگی جاری کردہ قواعد کے مطابق ہو گی۔
نوٹیفکیشن کے مطابق 7 فیصد ایڈہاک ریلیف الاؤنس کو پنشن اور گریجویٹی کے حساب میں شامل نہیں کیا جائے گا، ریٹائرمنٹ کے موقع پر ملازم کی پنشن، گریجویٹی یا دیگر واجبات کا تعین کرتے وقت اس فائدے کو بنیادی تنخواہ کا حصہ نہیں سمجھا جائے گا۔
محکمہ خزانہ نے واضح کیا ہے کہ ایکسٹرا آرڈینری رخصت کے دوران ملازم کو ایڈہاک ریلیف الاؤنس ادا نہیں کیا جائے گا، رخصت ختم ہونے اور ملازم کے دوبارہ ڈیوٹی سنبھالنے کے بعد قواعد کے مطابق الاؤنس کی ادائیگی ممکن ہو گی۔
صوبائی حکومت کے فیصلے کے بعد متعلقہ محکموں اور اداروں کو نئی ہدایات پر عمل درآمد کرنا ہو گا، تنخواہوں کی تیاری کے دوران ملازم کے گریڈ، رننگ بنیادی تنخواہ، ٹیکس واجبات اور رخصت کی نوعیت کو مدنظر رکھا جائے گا تاکہ الاؤنس کی ادائیگی نوٹیفکیشن میں درج شرائط کے مطابق یقینی بنائی جا سکے۔
مزید پڑھیں۔سونا پھر مہنگا ، فی تولہ قیمت کتنی ہو گئی ؟
