راولپنڈی (نیوز ڈیسک) چیئرمین جوائنٹ چیفس آف اسٹاف کمیٹی (CJCSC) جنرل ساحر شمشاد مرزا، نشانِ امتیاز (ملٹری) نے عوامی جمہوریہ چین کی پیپلز لبریشن آرمی (PLA) کے 98ویں یومِ تاسیس کے موقع پر منعقدہ تقریب میں بطور مہمانِ خصوصی شرکت کی۔
تقریب میں اعلیٰ عسکری و سول حکام، میڈیا نمائندگان، کاروباری رہنما اور سول سوسائٹی کے افراد نے شرکت کی، جو پاکستان اور چین کے مابین گہرے تعلقات کا مظہر ہے۔
جنرل ساحر شمشاد مرزا نے چین کے عوام، اس کی عسکری قیادت اور پیپلز لبریشن آرمی کے تمام افسران و جوانوں کو دل کی گہرائیوں سے مبارکباد پیش کی۔ انہوں نے صدر شی جن پنگ کی بصیرت افروز قیادت میں چین کی تیز رفتار ترقی، جدیدیت اور عالمی سطح پر بڑھتے ہوئے کردار کو سراہا، اور PLA کے کردار کو امن، استحکام اور خوشحالی کا ضامن قرار دیا۔
اپنے خطاب میں چیئرمین CJCSC نے پاکستان اور چین کے درمیان “فولادی بھائی چارے” کو لازوال اور آزمودہ قرار دیتے ہوئے کہا کہ دونوں ممالک ہر شعبے میں اپنے تعلقات کو مزید وسعت دینے کے لیے پُرعزم ہیں۔ انہوں نے چین-پاکستان اقتصادی راہداری (CPEC) میں تعاون کے فروغ، دفاعی روابط کی مضبوطی اور علاقائی استحکام کے لیے مل کر کام کرنے کے عزم کا اعادہ کیا۔
انہوں نے پاکستان میں کام کرنے والے چینی شہریوں کی سیکیورٹی کو اولین ترجیح قرار دیتے ہوئے مکمل تحفظ کی یقین دہانی بھی کرائی۔
