ڈرائیونگ لائسنس(driving license) فیس کی ادائیگی کے لیے جدید کیش لیس نظام متعارف کرا دیا گیا ہے، جس کے بعد شہری اب بینکوں کے چکر لگائے بغیر اپنے موبائل فونز کے ذریعے آسانی سے فیس ادا کر سکیں گے۔
تفصیلات کے مطابق نیشنل ہائی ویز اینڈ موٹر وے پولیس نے عوامی سہولت کے پیش نظر ڈیجیٹل پیمنٹ سسٹم کا آغاز کیا ہے۔ اس اقدام کا مقصد فیس ادائیگی کے عمل کو تیز، آسان اور شفاف بنانا ہے۔
اس نظام کا افتتاح ڈی آئی جی آپریشنز اصغر علی نے کیا۔ ان کا کہنا تھا کہ اس سسٹم کے ذریعے شہریوں کو لمبی قطاروں اور بینکوں کے غیر ضروری چکروں سے نجات ملے گی۔
کیسے ادائیگی ہوگی؟
نئے نظام کے تحت شہری ایزی پیسہ، جیز کیش اور مختلف بینکنگ ایپس کے ذریعے فوری طور پر فیس جمع کرا سکتے ہیں۔
QR کوڈ سسٹم بھی فعال
نیشنل بینک آف پاکستان کے تعاون سے اسلام آباد ڈرائیونگ لائسنسنگ اتھارٹی میں QR کوڈ مشینیں نصب کر دی گئی ہیں، جن کے ذریعے ادائیگی کا عمل مزید تیز اور آسان ہو گیا ہے۔
کراچی میں شارع فیصل پر کار اور موٹر سائیکل کیلئے اسپیڈ لمٹ مقرر
دیگر شہروں تک توسیع
حکام کے مطابق اسلام آباد کے بعد اس سہولت کو شیخوپورہ اور کوئٹہ تک بھی پھیلایا جا رہا ہے، جبکہ جلد ہی اس نظام کو ملک بھر میں متعارف کرانے کا منصوبہ ہے۔
شہریوں کو کیا فائدہ ہوگا؟
موٹر وے پولیس حکام کا کہنا ہے کہ اس سسٹم کے ذریعے:
- فیس کی ادائیگی فوری (ریئل ٹائم) تصدیق کے ساتھ ممکن ہوگی
- لائسنس کے حصول کا عمل تیز ہو جائے گا
- شفافیت اور کارکردگی میں نمایاں بہتری آئے گی
یہ اقدام سرکاری خدمات میں ڈیجیٹلائزیشن کی جانب ایک اہم پیش رفت قرار دیا جا رہا ہے، جس سے روزانہ ہزاروں شہری مستفید ہوں گے۔
