اسلام آباد میں جاری معاشی مذاکرات کے دوران بے نظیر انکم سپورٹ پروگرام سے متعلق ایک اہم اپ ڈیٹ سامنے آئی ہے، جس کے تحت مستحق خاندانوں کے لیے مالی امداد میں نمایاں اضافے کی تجویز زیر غور ہے۔ ذرائع کے مطابق عالمی مالیاتی ادارے آئی ایم ایف نے حکومت پاکستان کو تجویز دی ہے کہ مہنگائی کے بڑھتے ہوئے دباؤ کو مدنظر رکھتے ہوئے بی آئی ایس پی کی سہ ماہی قسط میں اضافہ کیا جائے۔
رپورٹس کے مطابق اس وقت مستحق خواتین کو 14 ہزار 500 روپے کی سہ ماہی امداد دی جا رہی ہے، تاہم نئی تجویز کے تحت اس رقم میں 5 ہزار 500 روپے اضافہ کرکے اسے 20 ہزار روپے تک بڑھانے پر غور کیا جا رہا ہے۔
ذرائع کا کہنا ہے کہ آئی ایم ایف اور پاکستانی حکام کے درمیان اس حوالے سے تفصیلی مذاکرات جاری ہیں، جن میں سماجی تحفظ کے نظام، غریب خاندانوں کے لیے مالی معاونت اور آئندہ مالی سال کے بجٹ پر مشاورت کی جا رہی ہے۔
حکام کے مطابق بے نظیر انکم سپورٹ پروگرام میں اضافے کی حتمی منظوری ابھی باقی ہے، تاہم حکومت اس تجویز پر سنجیدگی سے غور کر رہی ہے تاکہ کم آمدنی والے طبقات کو مہنگائی کے اثرات سے ریلیف فراہم کیا جا سکے۔
مذاکرات کے دوران ٹیکس نظام، سیلز ٹیکس میں چھوٹ اور مالیاتی خسارے سے متعلق امور بھی زیر بحث آئے۔ ذرائع کے مطابق آئی ایم ایف نے ٹیکس نیٹ کو مزید وسیع کرنے اور معاشی اصلاحات پر زور دیا ہے۔
وزارت خزانہ کے ذرائع کا کہنا ہے کہ نئی مجوزہ رقم کو موجودہ معاشی فریم ورک کے مطابق حتمی شکل دی جائے گی، جبکہ اس حوالے سے فیصلہ آئی ایم ایف مشن کے ساتھ جاری آخری مراحل کے مذاکرات میں متوقع ہے۔
معاشی ماہرین کا کہنا ہے کہ اگر یہ تجویز منظور ہو جاتی ہے تو لاکھوں مستحق خاندانوں کو براہ راست مالی ریلیف ملے گا، خاص طور پر ایسے وقت میں جب ملک میں مہنگائی عام آدمی کی مشکلات میں اضافہ کر رہی ہے۔
