راولاکوٹ: راولاکوٹ میں امن و امان کی صورتحال کشیدہ ہونے کی اطلاعات موصول ہوئی ہیں، جہاں مبینہ جھڑپوں اور کشیدگی کے دوران ایک سب انسپکٹر شہید جبکہ 15 سے زائد پولیس اہلکار زخمی ہو گئے۔
ذرائع کے مطابق زخمی اہلکاروں کو قریبی اسپتالوں میں منتقل کر دیا گیا ہے جہاں انہیں طبی امداد فراہم کی جا رہی ہے۔ بعض زخمی اہلکاروں کی حالت تشویشناک بتائی جا رہی ہے۔
اطلاعات کے مطابق علاقے میں کشیدگی برقرار ہے جبکہ سیکیورٹی فورسز اور قانون نافذ کرنے والے اداروں کی اضافی نفری تعینات کر دی گئی ہے۔ حساس مقامات کی نگرانی سخت کر دی گئی ہے تاکہ صورتحال مزید خراب نہ ہو۔
ذرائع کا کہنا ہے کہ موجودہ حالات کے پیش نظر ضلعی انتظامیہ کرفیو نافذ کرنے پر غور کر رہی ہے، تاہم اس حوالے سے تاحال کوئی باضابطہ اعلان سامنے نہیں آیا۔
حکام کی جانب سے شہریوں سے اپیل کی گئی ہے کہ وہ غیر ضروری نقل و حرکت سے گریز کریں اور صرف مستند ذرائع سے معلومات حاصل کریں۔
واقعے کی مزید تفصیلات اور سرکاری مؤقف سامنے آنے پر خبر کو اپ ڈیٹ کیا جائے گا۔
