اسلام آباد: وفاقی حکومت نے شہریوں کو مزید سہولت فراہم کرنے کے لیے ڈور سٹیپ پاسپورٹ ڈیلیوری سروس متعارف کرانے کا فیصلہ کر لیا ہے۔ اس اقدام کا مقصد پاسپورٹ کے حصول کے عمل کو آسان اور جدید بنانا ہے تاکہ شہریوں کو دفاتر کے غیر ضروری چکر نہ لگانے پڑیں۔
میڈیا رپورٹس کے مطابق ڈی جی امیگریشن اینڈ پاسپورٹ محمد علی رندھاوا کی زیر صدارت ہونے والے ایک اہم اجلاس میں امیگریشن اینڈ پاسپورٹ کی ڈیجیٹل ایپ اور مختلف اصلاحاتی منصوبوں کا جائزہ لیا گیا۔ اجلاس کے دوران ڈور سٹیپ پاسپورٹ ڈیلیوری سروس کے آغاز سے متعلق اہم پیش رفت سامنے آئی۔
ذرائع کے مطابق پاسپورٹ کی گھر تک ترسیل کے لیے نئے اسٹینڈرڈ آپریٹنگ پروسیجرز (ایس او پیز) کو حتمی شکل دے دی گئی ہے۔ سروس کے آغاز کے بعد شہری اپنے پاسپورٹ مقررہ پتے پر وصول کر سکیں گے، جس سے وقت اور اخراجات دونوں کی بچت ہوگی۔
حکام کا کہنا ہے کہ حکومت پاسپورٹ کے نظام کو مزید ڈیجیٹل اور صارف دوست بنانے کے لیے مختلف اقدامات کر رہی ہے۔ اسی سلسلے میں جدید ٹیکنالوجی کے استعمال اور آن لائن سہولیات میں اضافے پر بھی خصوصی توجہ دی جا رہی ہے۔
ماہرین کے مطابق ڈور سٹیپ پاسپورٹ ڈیلیوری سروس کے آغاز سے بالخصوص بزرگ شہریوں، خواتین اور دور دراز علاقوں میں رہنے والے افراد کو نمایاں سہولت ملے گی۔ توقع ہے کہ اس اقدام سے پاسپورٹ کے حصول کا عمل پہلے سے زیادہ آسان اور شفاف ہو جائے گا۔
