کراچی: سونے کی قیمت میں عالمی مارکیٹ میں کمی کے بعد پاکستان میں بھی نمایاں گراوٹ ریکارڈ کی گئی ہے، جس سے مقامی صرافہ بازاروں میں خریداروں اور سرمایہ کاروں کی توجہ ایک بار پھر قیمتی دھاتوں کی جانب مبذول ہوگئی ہے۔
آل پاکستان جیمز اینڈ جیولرز صرافہ ایسوسی ایشن کے مطابق جمعرات کے روز ملک بھر میں فی تولہ سونے کی قیمت 2 ہزار 300 روپے کمی کے بعد 4 لاکھ 52 ہزار 936 روپے ہوگئی۔ اسی طرح 10 گرام سونے کی قیمت میں 2 ہزار 70 روپے کی کمی ریکارڈ کی گئی جس کے بعد نئی قیمت 3 لاکھ 87 ہزار 615 روپے مقرر ہوئی۔
عالمی مارکیٹ میں بھی سونے کے نرخوں میں کمی دیکھی گئی، جہاں فی اونس سونا 23 ڈالر سستا ہو کر 4 ہزار 305 ڈالر کی سطح پر آگیا۔ ماہرین کے مطابق بین الاقوامی مارکیٹ میں اتار چڑھاؤ کا براہ راست اثر مقامی مارکیٹ پر بھی پڑ رہا ہے۔
دوسری جانب چاندی کی قیمتوں میں بھی نمایاں کمی ریکارڈ کی گئی۔ عالمی مارکیٹ میں چاندی 1.44 ڈالر فی اونس سستی ہوئی، جس کے بعد مقامی صرافہ بازار میں فی تولہ چاندی 144 روپے کمی کے ساتھ 7 ہزار 359 روپے پر آگئی۔
اسی طرح 10 گرام چاندی کی قیمت میں 123 روپے کمی ہوئی اور نئی قیمت 6 ہزار 268 روپے مقرر کی گئی۔
یاد رہے کہ گزشتہ روز سونے کی قیمت میں معمولی اضافہ ریکارڈ کیا گیا تھا، تاہم عالمی سطح پر نرخ کم ہونے کے بعد مقامی مارکیٹ میں بھی مندی کا رجحان دیکھنے میں آیا ہے۔ ماہرین کا کہنا ہے کہ آنے والے دنوں میں عالمی معاشی صورتحال اور ڈالر کی حرکت قیمتی دھاتوں کی قیمتوں پر اثر انداز ہوسکتی ہے۔
