عالمی منڈی میں تیل مزید سستا، پاکستان میں پیٹرول کی قیمتوں میں کمی کا انتظار برقرار

اسلام آباد: پیٹرول کی قیمتوں میں کمی کے امکانات ایک بار پھر مضبوط ہو گئے ہیں کیونکہ عالمی منڈی میں پیٹرولیم مصنوعات کی قیمتیں ایران اور امریکا کے درمیان کشیدگی سے پہلے والی سطح سے بھی نیچے آ چکی ہیں۔ اس کے باوجود پاکستان میں پیٹرول اور ہائی اسپیڈ ڈیزل کی قیمتوں میں کوئی کمی نہیں کی گئی، جس پر عوام اور کاروباری حلقے حکومتی فیصلے کے منتظر ہیں۔

وفاقی وزیرِ پیٹرولیم کی جانب سے جاری کردہ اعداد و شمار کے مطابق 22 سے 26 جون کے دوران عالمی مارکیٹ میں پیٹرول کی پلیٹس قیمت میں 6.67 ڈالر فی بیرل، یعنی 6.78 فیصد کمی ریکارڈ کی گئی۔ اسی عرصے میں ہائی اسپیڈ ڈیزل کی پلیٹس قیمت 4.30 ڈالر فی بیرل یا 3.78 فیصد کم ہوئی۔

سرکاری چارٹ کے مطابق 22 جون کو پیٹرول کی پلیٹس قیمت 98.35 ڈالر فی بیرل تھی، جو 26 جون تک کم ہو کر 91.68 ڈالر فی بیرل رہ گئی۔ دوسری جانب ہائی اسپیڈ ڈیزل کی قیمت 109.09 ڈالر فی بیرل سے کم ہو کر 104.79 ڈالر فی بیرل پر آ گئی۔

عالمی منڈی میں نمایاں کمی کے باوجود حکومت نے حالیہ قیمتوں کے جائزے میں پیٹرول اور ڈیزل کی قیمتیں برقرار رکھنے کا فیصلہ کیا، جس کے باعث پیٹرول کی قیمتوں میں کمی کا فائدہ عوام تک منتقل نہیں ہو سکا۔

ماہرین کا کہنا ہے کہ عالمی سطح پر خام تیل اور پیٹرولیم مصنوعات کی قیمتوں میں مسلسل کمی کا اثر مقامی مارکیٹ پر بھی پڑنا چاہیے۔ اگر آئندہ قیمتوں کے تعین میں عالمی رجحان کو مدنظر رکھا گیا تو صارفین کو پٹرولیم مصنوعات کی قیمتوں میں ریلیف ملنے کے امکانات روشن ہو سکتے ہیں۔

عوامی اور کاروباری حلقوں کا مؤقف ہے کہ ایندھن کی قیمتوں میں کمی سے نہ صرف ٹرانسپورٹ کے اخراجات کم ہوں گے بلکہ مہنگائی میں بھی کمی آنے کی توقع ہے، جس سے عام شہریوں کو براہ راست فائدہ پہنچ سکتا ہے۔