عیدالاضحیٰ کی تعطیلات کے دوران سیاحوں کی بڑی تعداد میں متوقع آمد کے پیش نظر ضلعی انتظامیہ نے دفعہ 144 مری میں نافذ کرنے کا اعلان کر دیا ہے۔ ڈپٹی کمشنر مری کی جانب سے جاری احکامات کے مطابق مال روڈ سمیت مختلف علاقوں میں مخصوص پابندیاں عائد کی گئی ہیں تاکہ امن و امان کی صورتحال برقرار رکھی جا سکے۔
ضلعی انتظامیہ کے مطابق دفعہ 144 مری کے تحت مال روڈ پر خاندانوں کے علاوہ ہر قسم کے اجتماعات پر پابندی ہوگی۔ یہ پابندی 20 مئی سے 31 مئی 2026 تک نافذ العمل رہے گی۔
انتظامیہ کا کہنا ہے کہ عید کی چھٹیوں کے دوران مری میں غیر معمولی رش متوقع ہے، جس کے باعث ٹریفک کی روانی متاثر ہونے اور بدنظمی کے خدشات موجود ہیں۔ اسی صورتحال کو مدنظر رکھتے ہوئے یہ فیصلہ کیا گیا تاکہ شہریوں اور سیاحوں کو محفوظ ماحول فراہم کیا جا سکے۔
حکام کے مطابق دفعہ 144 کے نفاذ کا مقصد عوامی تحفظ، ٹریفک کنٹرول اور کسی بھی ناخوشگوار واقعے سے بچاؤ ہے۔ انتظامیہ نے شہریوں، سیاحوں اور کاروباری افراد سے مکمل تعاون کی اپیل کرتے ہوئے ہدایات پر عملدرآمد یقینی بنانے کا مطالبہ کیا ہے۔
یاد رہے کہ ہر سال عید اور گرمیوں کی تعطیلات میں مری اور گردونواح کے سیاحتی مقامات پر ہزاروں افراد کا رش دیکھنے میں آتا ہے، جس کے باعث ٹریفک جام اور دیگر مسائل جنم لیتے ہیں۔
