امریکا اور ایران کے درمیان ممکنہ سفارتی پیش رفت سے قبل امریکا ایران مذاکرات سے متعلق اہم تفصیلات سامنے آگئی ہیں، جن میں دونوں ممالک کی سخت شرائط اور خفیہ مطالبات شامل ہیں۔
ایرانی خبر ایجنسی کی رپورٹ کے مطابق امریکا نے مذاکرات کیلئے ایران کے سامنے کئی اہم شرائط رکھ دی ہیں۔ ان شرائط میں ایران کو جنگی ہرجانہ یا کسی قسم کا معاوضہ نہ دینے کی تجویز بھی شامل ہے۔
رپورٹ کے مطابق امریکا نے ایران سے تقریباً 400 کلوگرام افزودہ یورینیم امریکا منتقل کرنے کا مطالبہ کیا ہے۔ اس کے ساتھ امریکا نے یہ تجویز بھی دی ہے کہ ایران کو صرف ایک جوہری تنصیب فعال رکھنے کی اجازت دی جائے۔
ذرائع کے مطابق امریکی شرائط میں ایران کے بیرون ملک منجمد اثاثے بحال نہ کرنے اور جنگ بندی کو مستقبل کے مذاکرات سے مشروط رکھنے کی تجاویز بھی شامل ہیں۔
دوسری جانب ایران نے واضح مؤقف اختیار کرتے ہوئے کہا ہے کہ امریکا ایران مذاکرات سے پہلے مکمل جنگ بندی ناگزیر ہوگی۔ ایرانی حکام کے مطابق جنگ بندی صرف ایران تک محدود نہیں بلکہ لبنان سمیت تمام محاذوں پر ہونی چاہیے۔
رپورٹس کے مطابق ایران نے تمام اقتصادی پابندیاں ختم کرنے، بیرون ملک منجمد اثاثے بحال کرنے اور جنگی نقصانات کے معاوضے کا مطالبہ بھی کیا ہے۔
ایرانی حکام نے آبنائے ہرمز پر اپنی خودمختاری تسلیم کرنے کی شرط بھی مذاکرات کا حصہ بنا دی ہے، جسے عالمی تجارت کیلئے انتہائی اہم سمندری راستہ تصور کیا جاتا ہے۔
ماہرین کے مطابق دونوں ممالک کے سخت مؤقف اس بات کی نشاندہی کرتے ہیں کہ مذاکرات کا عمل پیچیدہ مرحلے میں داخل ہو چکا ہے اور خطے میں امن و استحکام کا مستقبل انہی بات چیت پر منحصر ہوگا۔
