ایران کے سپریم لیڈر علی خامنہ ای سے متعلق نئی تفصیلات سامنے آئی ہیں۔ رپورٹ کے مطابق ایران کے سپریم لیڈر علی خامنہ ای نے حملے سے قبل محفوظ مقام پر جانے سے انکار کر دیا تھا۔
ذرائع کے مطابق سکیورٹی حکام نے انہیں کئی مرتبہ کسی محفوظ مقام یا دوسرے شہر منتقل ہونے کا مشورہ دیا۔ لیکن انہوں نے یہ تجویز قبول نہیں کی۔
علی خامنہ ای کے بھارت میں نمائندے ڈاکٹر عبدالماجد حکیم الٰہی نے ایک انٹرویو میں یہ معلومات شیئر کیں۔
ان کے مطابق خامنہ ای کا کہنا تھا کہ پہلے پوری ایرانی قوم کو محفوظ مقام پر منتقل کیا جائے۔ عوام کو زیر زمین بنکر میں منتقل کرنے کے بعد ہی وہ خود کہیں جائیں گے۔
رپورٹ میں کہا گیا ہے کہ حملے کے وقت وہ اپنے گھر کے دفتر میں موجود تھے۔ اسی دوران میزائل حملہ کیا گیا۔
اسرائیل کی جانب سے دعویٰ کیا گیا تھا کہ ایران پر ایک دن میں بارہ سو سے زائد بم گرائے گئے۔ تاہم اس حوالے سے مکمل تفصیلات سامنے نہیں آئیں۔
ان انکشافات کے بعد ایران میں سوگ کی فضا بتائی جا رہی ہے۔ خطے کی صورتحال تاحال کشیدہ ہے اور عالمی سطح پر تشویش پائی جا رہی ہے۔
