ایران کی جنگی کامیابیوں سے متعلق ایک امریکی ٹی وی رپورٹ میں دعویٰ کیا گیا ہے کہ جنگ کے ابتدائی مرحلے میں کئی اہم ریڈار سسٹمز کو نشانہ بنایا گیا۔
رپورٹ کے مطابق اردن میں نصب جدید تھاڈ ریڈار سسٹم جنگ کے آغاز میں ہی تباہ کر دیا گیا۔ یہ نظام خطے کے دفاعی نظام کا اہم حصہ سمجھا جاتا تھا۔
امریکی ٹی وی کے مطابق متحدہ عرب امارات میں بھی دو مختلف مقامات پر تھاڈ ریڈار سسٹمز پر حملے کیے گئے۔
تاہم امارات میں ہونے والے نقصان کی مکمل تفصیلات ابھی سامنے نہیں آ سکیں۔ بتایا گیا ہے کہ یہ ریڈار عمارتوں کے اندر نصب تھے جس کے باعث صحیح اندازہ لگانا مشکل ہے۔
ماہرین کے مطابق ایک تھاڈ ریڈار سسٹم کی قیمت تقریباً پانچ سو ملین ڈالر ہوتی ہے، جو اس کی اہمیت کو ظاہر کرتی ہے۔
رپورٹ میں مزید بتایا گیا کہ قطر میں موجود ارلی وارننگ ریڈار سسٹم بھی حملے میں تباہ کر دیا گیا۔
دفاعی ماہرین کے مطابق ایران نے دشمن کے فضائی دفاع کو کمزور کرنے کے لیے کمیونیکیشن، ریڈار اور نگرانی کے نظام کو نشانہ بنایا۔
دوسری جانب پاسداران انقلاب کے ترجمان بریگیڈیئر جنرل علی محمد نائینی نے کہا ہے کہ ایران کسی بھی طویل جنگ کے لیے مکمل طور پر تیار ہے۔
ان کا کہنا تھا کہ ایران کے پاس جنگ کو طویل عرصے تک جاری رکھنے کی صلاحیت موجود ہے۔
انہوں نے مزید کہا کہ ایران جلد ایسے نئے اسٹریٹجک ہتھیار متعارف کرائے گا جو ابھی تک میدان جنگ میں استعمال نہیں کیے گئے۔
خطے میں کشیدگی برقرار ہے اور آنے والے دنوں میں صورتحال مزید واضح ہونے کی توقع ہے۔
