امریکا(اوصاف نیوز) امریکی صدر ڈونلڈ ٹرمپ نے شمال مغربی نائجیریا میں داعش کے خلاف ہلاکت خیز اور مؤثر فضائی حملوں کا دعویٰ کیا ہے، جن کا مقصد مسیحی شہریوں پر کیے جانے والے حملوں کو روکنا تھا۔
صدر ٹرمپ نے سوشل میڈیا پر جاری بیان میں کہا کہ امریکی فوج نے ان اہداف کو کامیابی سے نشانہ بنایا، جو نائجیریا میں تشدد اور دہشت گردی کے مرتکب تھے۔ انہوں نے مزید کہا کہ یہ حملے ان کارروائیوں کا حصہ ہیں جو امریکی حکومت نے پہلے بھی خبردار کرتے ہوئے کی تھیں، اور اگر مسیحی شہریوں کو نشانہ بنانا بند نہ کیا گیا تو مزید کارروائیاں کی جائیں گی۔
دوسری جانب امریکی وزیر جنگ پیٹ ہیگستھ نے نائجیریا کی حکومت کے تعاون پر شکریہ ادا کیا اور کہا کہ امریکی افواج کے افریقی کمانڈ کی جانب سے کیے گئے فضائی حملوں میں متعدد داعش کے دہشت گرد ہلاک ہوئے۔
امریکی فوج کے افریقی کمانڈ کے مطابق یہ حملے دہشت گرد گروہوں کے قیادت اور انفراسٹرکچر کو نشانہ بنانے کے لیے کیے گئے تھے تاکہ نائجیریا اور خطے میں شہریوں کی حفاظت یقینی بنائی جا سکے۔ امریکی حکام نے زور دیا کہ یہ کارروائیاں عالمی سطح پر دہشت گردی کے خلاف جاری تعاون کا حصہ ہیں اور ایسے اقدامات سے علاقائی استحکام اور سلامتی کو فروغ ملے گا۔
صدر ٹرمپ اور امریکی وزارت دفاع کے مطابق اس کارروائی کے بعد مزید نگرانی اور آپریشنز جاری رہیں گے تاکہ خطے میں داعش اور دیگر دہشت گرد تنظیموں کی کارروائیوں کو محدود کیا جا سکے۔
مزید پڑھیں:سکھ برادری کو پگڑی پہننے کی وجہ سے ہیلمٹ سے مستثنیٰ کر دیا گیا
