کراچی (اوصاف نیوز) نیشنل ڈیٹا بیس اینڈ رجسٹریشن اتھارٹی (نادرا) نے شہریوں کی سہولت اور ڈیجیٹل سروسز کے فروغ کے لیے ایک اور اہم قدم اٹھایا ہے۔
سندھ حکومت کے ساتھ مل کر، نادرا نے پاک آئی ڈی موبائل ایپ پر بائیو میٹرک تصدیق کی سہولت متعارف کرائی ہے، جس سے سندھ میں رجسٹرڈ گاڑیوں کی خرید و فروخت کا عمل آسان ہو گیا ہے۔
نادرا حکام کے مطابق اس نئی سہولت کے تحت شہری اب پاک آئی ڈی ایپ کے ذریعے گھر بیٹھے گاڑیوں کی خرید و فروخت کے لیے بائیو میٹرک تصدیق کروا سکیں گے جس سے دفاتر کے چکر لگانے اور طویل انتظار کرنے کی ضرورت ختم ہو جائے گی۔
حکام کے مطابق اس اقدام کا مقصد عوام کو جدید، محفوظ اور شفاف ڈیجیٹل سہولیات فراہم کرنا ہے تاکہ گاڑیوں کی منتقلی کے عمل کو تیز تر اور قابل اعتماد بنایا جا سکے۔
نادرا حکام کا کہنا ہے کہ اس سسٹم سے نہ صرف وقت اور اخراجات کی بچت ہو گی بلکہ جعلی لین دین اور فراڈ کے امکانات بھی کافی حد تک کم ہو جائیں گے۔ بائیو میٹرک تصدیق کے بعد شہری متعلقہ اداروں میں گاڑی کی منتقلی سے متعلق مزید قانونی کارروائی مکمل کر سکیں گے جس سے مجموعی عمل مزید منظم ہو جائے گا۔
نادرا کے مطابق پاک آئی ڈی ایپ پہلے ہی شناختی دستاویزات سے متعلق مختلف سہولیات فراہم کر رہی ہے اور اب گاڑیوں کی بائیو میٹرک تصدیق کا اضافہ ایک اہم سنگ میل ہے۔
نیشنل ڈیٹا بیس اتھارٹی کے حکام کا کہنا ہے کہ اس اقدام سے خاص طور پر ان شہریوں کو فائدہ پہنچے گا جو مصروف شیڈول یا فاصلے کی وجہ سے سرکاری دفاتر جانے سے گریز کرتے ہیں۔
حکام نے بتایا کہ ابتدائی مرحلے میں یہ سہولت سندھ میں رجسٹرڈ گاڑیوں کے لیے متعارف کرائی گئی ہے تاہم مستقبل میں اسے دوسرے صوبوں تک بڑھایا جائے گا۔
دوسری جانب شہریوں نے نادرا کے اس اقدام کا خیرمقدم کرتے ہوئے کہا ہے کہ ڈیجیٹل سہولیات واقعی عام آدمی کی زندگی کو آسان بنا رہی ہیں۔
