نیو یارک (اوصاف نیوز) اقوامِ متحدہ میں جوہری ہتھیاروں سے متعلق اہم کانفرنس کے آغاز پر امریکہ اور ایران کے درمیان سخت جملوں کا تبادلہ دیکھنے میں آیا، جس نے چار ہفتوں پر محیط اس اجلاس کے دوران مزید کشیدگی کے امکانات کو بڑھا دیا ہے۔
الجزیرہ کے مطابق یہ تنازع اس وقت شدت اختیار کر گیا جب ایران کو کانفرنس کے 34 نائب صدور میں شامل کر لیا گیا۔ ایران کی نامزدگی غیر وابستہ تحریک کی جانب سے کی گئی تھی، جس میں 121 ترقی پذیر ممالک شامل ہیں۔ اس فیصلے پر امریکہ نے سخت ردعمل ظاہر کیا اور اسے حیران کن قرار دیا۔
امریکی نمائندے نے کہا کہ ان کا ملک اس بات پر شدید حیرت کا شکار ہے کہ ایک ایسا ملک، جس نے جوہری عدم پھیلاؤ کے معاہدے کی کھلم کھلا خلاف ورزی اور بے توقیری کا مظاہرہ کیا، اسے کانفرنس کا نائب صدر منتخب کر لیا گیا ہے۔ امریکہ کے اس مؤقف کی حمایت آسٹریلیا اور متحدہ عرب امارات نے بھی کی، جبکہ برطانیہ، فرانس اور جرمنی نے بھی اس معاملے پر تشویش کا اظہار کیا۔
دوسری جانب روس نے ایران کو تنقید کا نشانہ بنانے کی مخالفت کی اور اسے غیر ضروری قرار دیا۔ ایران کے نمائندے نے امریکی الزامات کو سختی سے مسترد کرتے ہوئے انہیں بے بنیاد اور سیاسی مقاصد پر مبنی قرار دیا۔ ان کا کہنا تھا کہ یہ الزامات حقیقت کے برعکس ہیں اور ان کا مقصد صرف ایران کو بدنام کرنا ہے۔
ماہرین کے مطابق اس معاملے پر جاری اختلافات آنے والے دنوں میں مزید شدت اختیار کر سکتے ہیں، کیونکہ جوہری پروگرام کے حوالے سے امریکہ اور ایران کے درمیان پہلے ہی شدید بداعتمادی موجود ہے، اور یہ کانفرنس دونوں ممالک کے درمیان سفارتی محاذ آرائی کا ایک اور میدان بن سکتی ہے۔
مزید پڑھیں:تیل کی قیمت میں اضافہ
